Nongstoiñ, Ïaiong 24: Ka Sib Singh Memorial Government Higher Secondary School Nongpyndeng, ka la rah ia ka nam kum ka lahduh (over all champion) ha ka lympung 31st District Level Inter School Athletic Meet 2026 kaba lai sngi lynter, ba la pyniaid da ka ophis jong ka District Sports Officer West Khasi Hills District Nongstoin.
Ka Sib Singh kala ioh ia ka nam lahduh hadien ba ka la ioh ban khur 13 tylli ki takma ksiar, 5 tylli ki takma rupa bad 2 tylli ki takma rnong. Ka St Peters HSS Pyndengrei, ka la wan ba-ar da ka jingoh khur 7 tylli ki takma ksiar, 6 tylli ki takma rupa bad 4 tylli ki takma rnong. Katba ha ka kyrdan ba lai, ka St John Bosco HSS Rambrai ka la khur 6 takma ksiar, 4 tylli ki takma rupa bad 11 tylli ki takma rnong.
Shuh shuh, ha kane ka lympung ia ka nam Best Disicipline Team la ioh da ka Joel Gatphoh Memorial HSS. Ka khusnam Best March Pass la khur da ka Anderson Higher Secondary School Upper New Nongstoin bad ha ka kyrdan ba ar la ioh da ka Assembly of God SS Nongstoin.
Nalor ki Best Team ha ki kyrdan bapher bapher, ia ka nam Best Athlete Under-14 khynnah shynrang la ioh da u Binraplang Pariong na ka Bethel Pres SS. Katba na ka liang ki kynthei la ioh da ka Ibashimti Nongsiang na ka Nongtraw SS.
Ha ka Under-16 ki khynnah shynrang, u Wanteikyrpang Marbaniang jong ka Sib Singh HSS u ka khur ia ka nam Best Athlete. Katba na ka liang ki kynthei la khur da ka Josephine Sohlangpiaw jong ka Don Bosco SS Mawkhlam.
Ha ka Under-18 ki khynnah shynrang u Edify Shyrkon jong ka St Xaviers HSS u la khur ia ka nam Best Athelete. Katba na ka liang ki kynthei ka Aidalin Marwein jong ka Sib Singh HSS ka la khur ia ka nam Best Athelete.
Lah ban pynkynmaw hangne ba ha kane ka lympung Athletic Meet mynta u snem, ki la don haduh kumba 36 tylli ei ei ki skul ha West Khasi Hills kiba la shim bynta shitrhem naduh ka sngi ba la plie pyrda ha ka 22 tarik, ha kaba ka kongsan Kong C.Kharbhih ka la don lang ban ai mynsiem.
Ha ka sngi thohdieng pat kaba dei ka sngi ba pynkut, u MLA jong ka Nongstoin Bah Gabriel Wahlang u la don lang ban shim bynta ym tang ha kaba ai jingkren, hynrei ban sam ruh ia ki khusnam sha ki nongjop bapher bapher. Nalor u kongsan la donlang ruh u Bah Pynshai Momin BDO Shallang kum u symbud kongsan.
Ha kane ka sngi la pynkut da ka prokram ba shongkun ha ka ryngkat ka jingdonlang ka District Sports Officeer Kong Balarina Syiem, ki nonghikai skul, ki khynnah skul, ki riew pawkhmat bad kiwei kiwei pat kiba la sakhi ia kane ka sngi.
 ha ka lympung 31st District Level Inter School Athletic Meet 2026 kaba lai sngi lynter, ba la pyniaid da ka ophis jong ka District Sports Officer West Khasi Hills District Nongstoin.){kind=link}