Shillong, Nailur 28: Ka jingtrei shitom jong ka sorkar jylla ban pynbit pynbiang ha ka liang ka koit ka khiah ka la sei soh dang shen ha kaba ka jylla ka la ioh ban rah ia ka khusnam ‘Ayushman Utkrishtata Puraskaar 2022’ (Ayushman Excellence Awards) ha ki ar bynta na ka National Health Authority (NHA), ha nongbah New Delhi.
Ka jylla ka la ioh ha ka kyrdan kaba nyngkong duh na ka jingbun ki doctor bad ki nos ha ka jylla bad ka la ioh ruh ia ka Best Performing State (Small)’ category award na ka bynta ka jinglah ban pyntreikam ia ka skhim Ayushman Bharat Pradhan Mantri Jan Arogya Yojana jong u snem 2021-2022.
Ha ka jingthoh jong u myntri rangbah ha twitter, u la pynpaw ia ka jingkmen ban iohi ia ka jylla ba ka ioh ran ia kine ki khusnam. U la ai khublei ia ka kynhun “Team Meghalaya” kaba la wanrah ia kane ka burom, bad u la ai ruh ka jingiaroh ia ka tnad ka koit ka khiah bad baroh kiba don bynta ban pynurlong ia ka jingthrang jong ka jylla.
Ha ka jingkren paidbah dang shen, u myntri rangbah ka jylla u la ong ba ka “sorkar jylla ka dang pyrshang ban kham pynbha shuh shuh ia ki lad ai jingsumar na ka bynta ki ba bun balang khnang ba kan long ka jingkyrkhu”. Dei da ka jingiatreilang jong ka jylla bad ki briew ba ka jylla ka la ioh ban rah ia kine ki khusnam artylli.
La sam ia ki jingai sngewbha bad ki khusnam da u myntri khynnah ka sorkar India – Mansukh Mandaviya, ha ka sngi pynhap pyrda ia ka Arogya Manthan 2022, kaba rakhe ia ka jingdap 4 snem jong ka Ayushman Bharat PMJAY.
Ka Ayushman Bharat PMJAY ka dei ka shnat sorkar ka ba ai loan ia ki briew ba duk, ba la bei tyngka da ka sorkar kmie kaba don ia ka thong ban iarap ia kiba duk ba kyrduh ban shah sumar ha ki hospital, kaba kot shaduh 5 lak tyngka ha ki hospital sorkar bad ki hospital riew shimet kiba ia teh soskular bad ka sorkar.
Ka Ayushman Bharat Digital Mission (ABDM) ka don ia ka thong ban pynkiew ia ka rukom sumar lyngba ki kor saian ba thymmai ba la sdang pyndonkam ha ka ri baroh kawei. Kane kan long ka lad ka lynti ban pyniasnoh ia ka jingiadei hapdeng ki nongsumar bad ki nongshah sumar lyngba ki jingstad thymmai jong ka juk mynta.
