Shillong, Nailur 28 :U Myntri Rangbah ka Jylla Conrad K Sangma hynne ka sngi Balang, ula kyntu ia ki Saiantist ka Krishi Vigyan Kendra (KVK) ba kin wanrah ia ka jingstad saian bad ka jingpyndonkam ia ki kor ki bor ka juk ha ka rukom rep ba mynta khnang ban lah wanrah ia ka kam rep kaba paka.
U Myntri Rangbah ula buh ia kane ka jingkyntu haba plie ia ka National Seminar ba lai sngi halor ka mat “iakren markhmat bad ki Saiantist ka KVK ba ioh award” bala pynlong ha College of Post Graduate Studies in Agricultural Science, CAU, Umiam.
Haba kren ha ka jingialang, u Myntri Rangbah ula ong ba kane ka jingialang bala pynlong ha ka sien ba nyngkong eh hapoh ka Ri ka dei kaba kongsan namar ka jingithuh ia ka kam jong ki saiantist ka KVK.
“Nalor ka jingithuh ia ka jingshakri ka KVK Saiantist, ka ai ruh ka lad ban ioh iasam ia ki rukom leh (practice) ba bha tam jong ki Krishi Vigyan Kendra ba don ha ka Ri, khamtam ha ki Jylla ka Thain Shatei Lam Mihngi ka ban long ka jingmyntoi kaba khraw ia ki Nongrep” ula ong.
Haba pynpaw ba ki Nongrep ki dei kiba la pynleit jingmut bha da ka Sorkar Meghalaya, u Myntri Rangbah ula ong “Ki nongrep ki don ia shibun jait ki jingeh la ka dei ha ka jingthied ia ki symbai ha ka por ba biang, ka jingiasoh bad ki iew ki hat, ka jingbym don ki jaka buh ia ki marrep, ka jingbym don ki kor ki bor ban kyrshan bad ka jingbym don ki kor song ia ki mar ba ki pynmih”.
U Myntri Rangbah ula ong ba ki nongrep ki donkam ia ka jingiarap ba bun jait ha ki kam bapher bapher haba pynpaw ruh ba kam long satia kaba iahap ban wanrah ia ka rukom rep ba na shabar ban pynbor ia ki nongrep hangne ba kin bud.
“Ban pynkylla ia ka rukom rep kan dei kaba bakla bad bym iahap satia hynrei ban wanrah ia ka jingstad saian bad ki jingtip ban pyndonkam ia ki kor ki bor bad ki buit ha ka rukom rep ba mynta ka dei ka jingtynjuh kaba eh shisha” ula ong.
U Myntri Rangbah ula bynrap ba ki nongrep ki dei ki spah jong ka Ri bad ka jingpynbeit ia ki jingeh jong ki nongrep ka donkam ia ka buit bad ka rukom plan kaba biang bha.
Ula ai jingmut ruh ban buh jingthoh ia baroh ki jingiasyllok jong kane ka seminar bad ban iasam bad baroh ki Jylla khnang ba kawei pa kawei ka Jylla ka lah ban pyntreikam ia ki buit kiba iahap bad ki Jylla.
The KVK network has played an important role in the agriculture sector through scientific research, use of technology and knowledge-sharing.
Encouraged the gathering today to create further impact through experience sharing that can go a long way in helping our farmers. pic.twitter.com/NCCb20UYO2
— Conrad Sangma (@SangmaConrad) September 28, 2022
