Guwahati, Iaiong 23: Kawei ka samla kaba dang 19 snem ka rta kaba dei na West Karbi Anglong district, ka jylla Assam ka la shah kem ha ka step jong ka sngi Palei halor ka jingkynnoh ba ka la khrai khlieh ia la ka jong ka kmie da ka tukri.
Ki nongshong shnong ki la pyntip sha ki pulit, kiba la leit mar mar sha katei ka jaka bad ki la kem ia katei ka nongshah kynnoh. Ha ka jingtohkit, ki bor pyniaid ki la lap ia ka waitlam, ka khanshi, bad ki tiar leh niam kynthup ia ka umphniang, ka vermolin, bad ka khiew khyndew na ka jaka ba la buh rieh kaba don hajan.
Ki pulit ki la iathuh ba ia kane ka lanot la tip kyrteng kum ka Anumai Malang (42) bad la phah ban leh ia ka postmortem, katba ia ka tiar kaba la pyndonkam ha kane ka kam runar yn phah ban leh ia ka Forensic Examination.
Katkum ka jingiathuh ki heh ophisar ka Baithalangso police station, kane ka jingjia ka la jia ha ka shnong Deramukh Lalung ha ka miet jong ka sngi Palei, hadien kane katei ka nongshah kynnoh ka la phet noh ryngkat bad ka khlieh ba la khrai.
“La lap ia ka na kawei ka jaka khlaw ha ka por mynstep.Ngi la ioh kurup ia ka khlieh ba la shah khrai bad ia ka tiar pyniap briew na ka kti jong ka.La kem ia ka bad hadien la rah noh ia ka ha khmat ka iing bishar”, la ong u Diganta Saikia, ophisar in-charge jong ka Baithalangso Police Station.
Katei ka nongshah kynnoh ka ba la tip kyrteng kum ka Pooja Malang, ka la shah pynngat hapoh ka kyndon 103 (murder) bad 119 (voluntarily causing grievous hurt by dangerous weapons) jong ka Bharatiya Nyaya Sanhita (BNS), la iathuh ki pulit.
Katkum kiba ha iing, la ong ba ka Pooja ka la leit shabar ha ka por janmiet bad ka la wan phai sha la iing ha ka por 10 baje mynmiet. “Ka la rung ha ïing da u dao (machete ne tukri), ka la leit beit beit sha la ka kmie bad ka la khrai khlieh ïa ka”, ki la ïathuh.
U kpa bad ka para jong ka u la mynsaw katba ki dang pyrshang ban khanglad ia ka, watla ka jingmynsaw kam da jur bha, la iathuh ki pulit. “Katkum ka jingkren jong ki bahaïing, kam shym la thombor shuh ïa ki, ka la shim ïa ka khlieh ba la khrai bad ka la mih noh na ïing,” la bynrap shuh shuh ki heh ophisar.
Ki bahaïing ki la pyntip sha ki pulit, hadien kata ka kynhun na Baithalangso police station ki la poi sha katei ka jaka bad ki la pynlong ïa ka jingkhynra. Hynrei ym shym la lah ban lap ia katei ka nongshah kynnoh haduh ka step jong ka sngi Palei.
“Ka la leit sah sha ka jaka khlaw kaba rben.Ngim shym la lah ban lap ia ka ha ka por miet.Ha ka por mynstep, la lap ia ka bad kam shym la pyrshang ban phet krad ynda ka la iohi ia ki pulit.Kane ka dei ka case kaba khia bad ngi dang pyrshang ban pynthikna ia ka jingthmu,” la ong u Saikia.
U la bynrap ruh ba na ka liang ka longïing kam shym la pyntip ïa kano kano ka jingïakynad ha ïing ha sem hapdeng ka kmie bad ka khun kynthei kaba lah ban poi shaduh une u pud.
“Ka dang don hapdeng ka eksamin (mandatory medical examination) bad ngi dang pyrshang ban buh jingkynthoh ia ka jingkren jong ka bad ka dang kloi palat ban poi sha kaba kut”, u la ong.
Katto katne ki nongshong shnong ki la kam ba kane ka nongshah kynnoh ka lah ban donkti ha ki kam leh sniew ne hapoh ka jingktah jong ki jingdih pynbuaid. Hynrei ki pulit ki la iathuh ba ym pat lah ban pynlong ia kum kane ka bynta haduh mynta.
“Ym shym la lap ïa ki dak jong ka jingdih buaid ha ka por ba eksamin nyngkong, watla la phah ïa ka snam jong ka ban test.Ki bahaïing hasem ki la kdew ïa ki jingeh kiba lah ban don ha ka bor pyrkhat, hynrei ym don kano kano ka sakhi ban kyrshan ïa ki jingkynnoh ba don ka jingleh sniew ne jadu bad kiwei kiwei.Kum kine ki paw kum ki jingkynnoh bym pat lah ban pynshisha”, la ong ki heh ophisar.
