Shillong, Iaiong 22 : Ka Iingkashari Meghalaya High Court ha ka sngi Ba-ar, kala pynwai noh ia ka PIL ba tynjuh ia ka jingtyrwa shna ia ka Greenfield High Speed Corridor lyngba ka Ri-Bhoi District hadien ba ka Sorkar Jylla bad ki borkhmih ka SorkarPdeng kila kular ban buh pyrrkhing ia ki kyndon bad ki jingiada ia ka mariang.
Ka Division Bench ba kynthup ia ka Chief Justice Revati Mohite Dere bad Justice W Diengdoh kala pynmih ia kane ka hukum haba shong bishar ia ka PIL bala mudui da u Pynskhemlang Sohtun pyrshah ia ka Sorkar Jylla, Deputy Commissioner ka Ri-Bhoi, NHIDCL, bad ka Ministry of Environment, Forest & Climate Change bad ka Road Transport & Highway.
U nongmudui ula pynpaw ia ka jingsngewkhia halor ka kam thied jaka, ka jingktah ia ka mariang bad ka jingiajan jong kane ka project bad ki jaka kyntang kynthup ia u Lum Sohpetbneng.
Ha ka affidavit bala ai sha ka Iingkashari, ki nongshah mudui kila kyntait ba ia ka jingthied jaka la leh hapoh ha National Highway Act, 1956.
“Ka borkhmih ia ka jingthied jaka hapoh ka Act u dei u Collector/Deputy Commissioner jong ki District” ong ka affidavit ka NHIDCL haba bynrap ba u DC ka Ri-Bhoi ula pynlong ia ka jingiasyllok kaba bniah bha bad ki Rangbah Shnong jong ki jaka ba shah ktah ha ka 11 tarik Nohprah 2024.
Ki jingeh bala pynsngew da ki kynhun ba shah ktah haba iadei bad ka jingpyniaid lynti lyngba ka tyllong um, ki lyngkha kba bad ki jaka rep lah mynjur ban pyllait noh, ong ka affidavit haba pyntip ba ia ka lynti iaid lad pynkynriah noh haba pynthikna ba ka tyllong um kan ym shah ktah bad ki lyngkha kba ruh kin duna kiba shah ktah.
Ha kawei pat ka affidavit, u Deputy Commissioner ka Ri-Bhoi, Abhilash Baranwal ula ong ba ka project ka dei halor ka jingpyntrei ia ka surok 4-lane highway corridor ba iaid lyngba ki 18 tylli ki shnong ha Ri-Bhoi District kata naduh ka shnong Pyllun sha Lumsohphoh” ban pynkhlain ia ka jingpyniasoh hapdeng ka Shillong-Guwahati bad Silchar.
Ula pyntip ba ka Jylla kala iasyllok bad ki Rangbah Shnong bad ki Shnong Shnong ban pynbeit ia ki jingsngewkhia ba kila pynsngew bad ala don ruh ka jingleit sorjamin lang ia ki jaka ha ka jingiadonlang ki Rangbah Shnong na ka bynta ban pyn shisha ia ki jaka, ban iakdew pud bad ban buh jingthoh ia u pud u sam.
Halor ka jingthied jaka, ka affidavit kala pynshai ba “ki sienjam ba nyngkong kum ka sorjamin bad ka rai ia ka lynti iaid ka dei ka kam bala leh lypa da ka Sorkar hashuwa ka jingpynbeit ia u pud jaka hapoh ka National Highway Act, 1956.
Haba pynbeit ia ka jingsngewkhia halor u Lum Sohpetbneng, ka affidavit u DC ka ong “Ym don khyndiat ruh ka jaka bala ithuh kum ka jaka kyntang ka ban shah ktah ha kane ka project bad ka lynti iaid jong ka High Speed Corridor ka jngai kumba 500 meter na ki jaka kyntang”.
Haba khmih ia ka affidavit bad ki jingbatai jong u DSGI, ka Iingkashari ka ong ba kam lap satia ia kano kano ka nongrim ha kane ka PIL haba khmih ia ka jingshisha, ba ki bor khmih kila pdiang bad mynjur ban bud ia ki SOP…bad baroh ki kyndon ba hap pyndep.
Ka Iingkashari ka pynpaw ba ki jingsngewkhia bala pynsngew da u nongmudui ki dei kiba ai jubab mynta ka sngi bad ba ki bor khmih kila kular ban shim ia ka sienjam ban iada ia ka mariang, ki wahduid, ki jaka leh niam bad kiwei kiwei bad ba kin shim ruh ia ki jingbit hashuwa ba kin pyntrei ia ka project bad ba kin ym iaid lait ia ki rule, ki kyndon ne ki jingbit.
Ka Iingkashari kala pynwai noh ia kane ka mukotduma haba bynrap ba u nongmudui u long laitluid ban ujor thymmai ia ka mukotduma lada mih kano kano ka daw ba thymmai hadien habud.
