Shillong, April 21: U Myntri Rangbah ka Jylla Conrad K Sangma ha ka sngi Ba-ar, ula pynlait paidbah ia ka CM-INSPIRE Scheme ban kyrshan bad ban pynkhlain ia ka jingmihkhmat jong ki samla ka Jylla ha ka India Civil Services.
Haba pynbna ia kane, u Myntri Rangbah ka jylla ula ong, ba kane ka skhim ka thmu ban pynkylla ia ka jingiai duna jong ka jingdon ki samla trai jylla ha ka eksamin jongka Union Public Service Commission (UPSC).
U Sangma ula pynpaw ba kane ka jingsdang kum ka sienjam kaba kongsan na ka bynta ban kyrshan ia ka jingangnud ka jongki. Ula pynpaw ba da ki snem, ka jingmihkhmat na ka jylla ha ka Civil Services kala duna palat bad kumta kane ka skhim kaba thymmai kan shimkhia halor kane ka jingduna.
Hapoh jong ka CM-INSPIRE, ki samla kiba la pyndep ia ka UPSC Preliminary Examination kin iohdpiang ia ka jingiarap pisa kaba T.50,000, katba kito kiba la shah jied ban leh ia ka ‘Mains’ kin ioh pdiang T.1 lak. Ia kane ka sienjam la pynwandur ban pynsuk ia ka jingdonkam pisa kine ki samla kiba don ia ka jingthrang bad ban pynthikna ba kine ki samla kiba stad kin ym shah bat namar ka jingshem jingeh ha kaba iadei bad ka pisa ka tyngka.
U Myntri Rangbah ula pynthikna ruh ba ka sorkar kan batskhem ia ka jingkular ban kyrshan ia kine ki samla kiba don ia ka jingthrang ha shi lynter ka jingiaid lynti ka jongki bad ka pynshlur ia ki ba kin pynleit jingmut ha ka thong kaba ki don.
Ki samla kiba tbit ki lah ban aplai lyngba ka Portal jongka Meghalaya Administrative Training Institute (MATI) shisien ba la khot ia ka aplikeshon.
Kane ka scheme kadei kaba la khmih lynti ba kan kyntiew shuh shuh ia ki samla kiba don ia ka jingthrang ban shakri ha ka Civil Service ha ka jylla ha ryngkat bad ka jingpynkhlain ka sorkar ha kaban pynleit jingmut ha kaban saindur ia ki nongialam kiban dang wan.
