Shillong, Iaiong 21: Ka Sorkar Jylla kala bthah ban pynlong ia ka jingtohkit halor ka jingkhyllem ki maw hajan Mawlieh, kaba la shim ia ka jingim jong ki arngut ki briew ha ka sngi Ba-ar bad u Symbud Myntri Rangbah ka Jylla Bah Prestone Tynsong ula bthah ia ki bor district, pulit bad ia ka National Highways and Infrastructure Development Corporation Ltd (NHIDCL) ba kin khmih bniah ia kaei kaba lam sha katei ka jingjia ka ban long bniah bha.
“Ka long kaei kaei ka jingjia kaba sngewsih ba hynin, la duh noh ia ka jingim ba kordor jong ki arngut namar ka jingjia ba ki mawbah mawsan kila tyllun bad hap ha kawei ka kali pick-up bad kitei arngut kila khlad noh ha shen” ong u Bah Prestone Tynsong ryngkat bad ka phah ia ka jingsngewlem sha ki bahaiing jong kine kiba khlad noh.
Kine ki arngut kiba la khlad noh la tip kyrteng kum u Wanbor Nianglang 40 snem ka rta na Pynursla bad u Nangteibor Khongthohrem 46 snem ka rta uba na ka shnong Lumwahniai.
U Bah Tynsong ula ong, ba ula bthah ba dei ban pynlong noh mardor ia ka Inquiry halor katei ka jingjia.
“Hynin ka sngi hi, nga lah bthah ia u SDO Civil bad ia ka kynhun jong ki pulit hapoh ka jingialam jong u SDPO Pynursla. Nga lah kren bad bthah ruh ia ka NHIDCL ryngkat bad ka kynhun ka jongka bad wat ia ka kompani kaba pyntrei ia ka projek jong ka Package-II ba kan khmih bniah biang halor ka jinghap jong ki mawbah mawsan kaba la lam sha ka jingiap jong ki arngut ki briew” ula ong.
Hynne ka sngi kala don ka jingleit jurip lang hapdeng ki ophisar jong ka tnad PWD bad ki bor pyniaid district.
“Nga lah bthah bad hynne ka sngi kila leit kum ka kynhun baroh kawei kila leit naduh na ka kyrdan jongu Executive Engineer, kila leit shatei bad ha ka jingdonlang jong SDO Civil, BDO bad ruh ha ka jingdonlang kiba donbynta ha ka kam bad dei halor kane ba ngi lah rai ba dei ban khang shwa shipor ia kane ka surok kaba lah ban long 2-3 sngi” ong u Bah Tynsong.
Ula kyrpad ia ki paitbah ba kin ai ia ka jingiatreilang ha ka por ba khang ia ka surok.
“Nga kyrpad da kaba sngewrit ia baroh kiba donbynta, khamtam eh ia ki paitbah na ka constituency jong nga, ba kin long kiba shah shitom shipor bad ngi, mynta ngi kwah ban phaikhmat sha ka bynta khamtam ia kaba ym shngain ha kaban iaid lyngba ha katei ka jaka. Kumta nga kwah ban kyrpad ia baroh ki paitbah jong ka thain Pynursla ban sngewbha ban iatreilang bad ngi bad ai ba ki bor pyniaid district kin shimkhia halor kane ka mat” ong u Bah Tynsong.
Ha kaba iadei bad ki sienjam ban lah pynbeit shi rta ia kane ka kam, u Symbud Myntri Rangbah ba mynta kin dang donkam ban shim shuh shuh ia ki jaka.
“Mynta ngi lah shim ia ka rai ba donkam ban shim shuh shuh ia ki jaka hynrei na ka bynta kane ngam pat ioh satia ia kano kano ka jingtip kaba thymmai hynrei ka rukom pyrkhat ka long ba ngin shim shuh ia ki jaka ha katei ka bynta, khnang ba yn lah ban pynkhuid baroh shi syndon ia ka jingtwa khyndew” ula ong.
 ba kin khmih bniah ia kaei kaba lam sha katei ka jingjia ka ban long bniah bha.){kind=link}