Shillong, Iaiong 20: U National Secretary ka BJP ba khmih ia ka Meghalaya Anil Antony ha ka sngi Nyngkong ula ong, ba ka Special Intensive Revision (SIR) jong ka Electoral Roll kadei kaba la pynkup bor da ka riti synshar ka ri, ba dei ban leh ha kylleng ki jylla bad ka Sorkar Pdeng ka pynkhreh ha kaban shimkhia ia ki jingsngewkhia ha ki thaiñ khappud jong ki jylla kynthup ia ka Meghalaya.
“Hooid, ka Special Intensive Revision (SIR) ka dei ka kam kaban iaid ha kylleng ki jylla ha ka ri India. Ka Election Commission of India kala dep ban pynbna ia ka hadien jong ka (elekshon) Bihar,” ong u Antony haba iakren bad ki nongthoh khubor.
Ula pynpaw ba kane ka rukom pynthymmai kam dei satia ka kam kaba dang long thymmai.
“Kane ka SIR kam dei kaba la jia mynta ha ka sien kaba nyngkong. Kadei kaei kaei kaba la pynkup bor da ka riti synshar. Naduh ki snem 1950, man la ka shiphew snem (Decade) kane kala jia. Ha ka por jong ka sorkar UPA ka lah jia 2 sien ne 3 sien. Mynta haiden katno phew snem kane ka kam kan sa sdang biang” ula ong.
Haba batai ia kane ka jingthmu, u Antony ula ong, “Ka jingthmu jong ka SIR ka long ban pynthikna ba kin don 3 tylli ki thong kiba kongsan, kawei ka long ban pynthikna ba man la ki briew kiba la palat ia ka 18 snem ka rta kin don ha ka Electoral Roll, ka baar ban pynthikna ba kino kino kiba don ha ka Electoral Roll ka kyrteng ka jongki kam dei ban long ka bym shisha ne Duplicate. Ha kiba bun ki jingjia ha kylleng ka ri India, ki don bun ki briew namar kiba bun ki daw, haba ki kynriah na ka jylla ne jaka sah ki don ha bun tylli ki Electoral Roll ha kylleng ki jylla. Mynta ia kine yn pyniasoh bad u Aadhaar ID. Ka balai ka long ban pynthikna kito baroh kiba la lah ban thep vote kin ioh ban thep vote.”
Ha kaba iadei bad ki jingsngewkhia ha ki thain khappud jong ki jylla, u Antony ula ong ba ka Sorkar Pdeng kala shim ia ka dur kaba shai kdar.
“Ka Sorkar Pdeng ka jong ngi, u Myntri Ragbahduh ka ri bad u Myntri Kam Pohiing ka ri kila dep ban ai ia ka jingpynpaw kaba shai kdar halor kane ka mat. Kino kino ki khappud jong ki jylla ha kylleng ka ri India kadei ka jingsngewkhia bad mynta ki nongialam ha ka Sorkar Pdeng ki dang trei ia ki kam ban pynthikna ba ia ki jingsngewkhia kiba la pynsngew dei ban ialeh ban pynbeit” ula ong.
“Bun jait ki kam kila jia, kum ka nuksa ka jingker sainar ha khappud ha kiba bun ki jylla kynthup ia ka Meghalaya kadei kaba la peitkhmat bha da kiba bun ki kynhun” la bynrap u Antony.
 jong ka Electoral Roll kadei kaba la pynkup bor da ka riti synshar ka ri, ba dei ban leh ha kylleng ki jylla bad ka Sorkar Pdeng ka pynkhreh ha kaban shimkhia ia ki jingsngewkhia ha ki thaiñ khappud jong ki jylla kynthup ia ka Meghalaya.){kind=link}