Shillong, Iaiong 20 : Ka Green Tech Foundation (GTF) ha ka sngi Nyngkong, kala weng noh ia ka jingshah thngan ba khlem pud hadien 12 sngi, hadien ba ka Sorkar Jylla kala rai ban weng noh ia ka project Taj Resort & Spa na dewlynnong Lumpongdeng ha Umiam.
“Mynta ka sngi ka dei ka dak ka jingpynkut ia ka jingshah thngan ba khlem pud jong ngi naba ka Sorkar Jylla kala pyndem ha ki jingdawa jong ngi” ong u Secretary General ka GTF Ritre Lyngdoh.
“Baroh kine kiei kiei kam dei ka bor jong ka Green Tech Foundation (GTF), kam dei ka bor jong u paidbah ne jongno jongno hynrei ka dei ka jingisynei jong u Blei” ula bynrap.
U Bah Ritre ula ong ba ka Sorkar kala pyntreikam ia ka jingdawa ba hakhmat eh ka kynhun. “Khublei ia ka Sorkar Meghalaya, kila shimkhia ban leh ia ka kam kat kum ka jingdawa jong ngi ba ka dewlynnong Lumpongdeng kan lait noh na ka Resort & Spa project”.
Hynrei, ula pynrem pat ia ki bor Sorkar namar ka jingpynslem bad ong “Kane ka dei ka Sorkar ka bym khein briew, kaba ka Meghalaya kala sakhi. Ka shimpor haduh 12 sngi bad 12 miet ia ki ba kin pyndem”.
“Ka Sorkar, watla ngi la antad ba kan sa pyndem hadien ka jingpoi hospital u Chairman jong ngi,hynrei mynta ka sngi, shim ia ka ktien jong nga ba ka 20 tarik Iaiong, ka Sorkar MDA ba ialam da ka NPP kala khynniuh da ka jingsyier” ula ong.
Halor ka thong jong ka kynhun, u Bah Ritre ula ong ““Kumba ka Green Tech Foundation ka la shim khia ban iakhun na ka bynta ka mariang bad ka jingdon jingma ban jot ka mariang ha dewlynnong Lumpongdeng, ngi la lah ban pynurlong ia ka thong jong ngi mynta ka janmiet. Hynrei, ka jyrsieh kaba ngi la pynpaw pyrthei ha ryngkat bad ki mat ba iadei bad ka mariang ka dang sah bad dang hap ban leh eiei”.
Ula kyntu ia kiwei ki kynhun ba kin buddien ia kine ki mat haba pyntip ba ka GTF kan sa ai ia ki kot ki sla ba ka iohlum.
 ha ka sngi Nyngkong, kala weng noh ia ka jingshah thngan ba khlem pud hadien 12 sngi, hadien ba ka Sorkar Jylla kala rai ban weng noh ia ka project Taj Resort & Spa na dewlynnong Lumpongdeng ha Umiam.){kind=link}