Agartala, Nailur 28:Shi sngi hadien ka jingkynnoh pyrshah ia u Myntri ki kam Ain ka Tripura u Ratan Lal Nath hapoh assembly ka jylla halor ka jingbyrthen ia ka lanot kaba la ngat ha ka jingshah leh beijot khnang ban khanglad ba kan leit sha ki bor pulit, na ka liang u nongthaw ain ka Congress u Sudip Roy Barman hynnin ka sngi ba Ar ula dawa na u Myntri Rangbah (CM) ka jylla u Manik Saha bad kumjuh na ka BJP ba kan shim ka jingpynshitom pyrshah ia une u myntri.
“Nga la pynpaw shai ha kaba iadei bad katei ka jingjia bad halor ka jingdonkti jong u Myntri ki kam ain ban aijingiada ia u nongleh beijot uba dei ruh u nongialam ka BJP hapoh ka iingdorbar assembly ha ryngkat ka jingiadon lang u CM bad baroh ki dkhot, ia kaba la record ruh hapoh ka iingdorbar.Mynta ka shong sa ha u CM bad ka BJP ba kin shim ia ki sienjam ban pynshitom,” ong u MLA ka Congress u Sudip Roy Barman.
Nalor kata utei u nongialam ka Congress u maham ruh ba un ym shah ba kane ka kam kan shu kut noh lada u CM ka Tripura um shim ia ki sienjam ban pynshitom pyrshah ia utei u myntri ki kam ain ka jylla u Ratan Lal Nath.
“Ia kane ka mat yn rah sha ki nongialam ba halor jong ka BJP bad sha u Myntri Rangbahduh (PM) ka ri.Ngin tied ruh ia ka jingkhang jong ka iingbishar,” ong shuh shuh utei u nongialam ka Congress.
U Sudip Roy Barman ula pynpaw hapoh ka dorbar ba kawei ka longkmie kaba la shah iehnoh hala ki jong kiba haiing hasem ha kine ki khyndait sngi ba la dep kala leit ban ujor hapoh Lefunga police station kaba hap hapoh ka constituency jong utei u myntri ki kam ain ban ai ka jingujor halor ka jingshah leh beijot ha u nongialam ka BJP bad u khun jong u para jong u.
Hynrei na ka liang ki bor pulit kila kyntait ban pdiang ia ka jingujor, namar na ka liang utei u myntri ula hukum ia ki ba kim dei ban rejistar case bad ban aijingmut pynban ia kane ka lanot ba kan leit iakynduh ia u na ka bynta ban ia pynbeit halor kine kiei kiei, ong u Roy Barman.
Hadien na ka liang u Nath ula khot ia kane ka lanot bad maham ia ka ba kam dei ban leit ujor sha ki pulit halor kane ka jingjia lane ban iathuh hano hano ruh lem kumta kiba haiing hasem jong ka kin duh noh ia ki kam ki jam ki jong ki, u khun jong ka un shah beh noh hapoh hostel bad ba ka jingim jong ki kan ngat ha ka jingeh, kynnoh utei u nongialam ka congress hapoh ka iingdorbar assembly.
