Shillong, Nailur 29: Hashwa ba ki 3 ngut ki nongjngi kin mih na ka jylla ban leit iashimbynta ha ka jingiakob jngi ha ka National Games, hynne ka sngi, ka Hynniewtrep Youth Council kala ai jingiarap ia kine ki samla kum ka jingai mynsiem iaki.
Ki 3 ngut ki samla kiban leit mihkhmat iaka jylla ban iashimbynta ha ka 75 National Games Aquatic Championship kaban long ha Gujarat, ki kynthup ia u Banpynshngain Syngwan, ka Pdiangsuklang Syngwan bad ka Mary Jones Syngwan.
U General Secretary ka HYC u bah Roy Kupar Synrem ula pynpaw iaka jingsngewsarong halor ka jingshah jied ki samla na ka thain Shella ban mihkhmat iaka jylla bad ula kitbok kitrwiang ia kine ki samla ba kin trei shitom ban ioh khur ia ki takma ha katei ka jingiakob.
“Ka jing jngi ha wah bad ha Swimming Pool ka iapher bha kumta ka seng kan shimkhia ha kaban dawa na ka sorkar ban buh iaka jaka kilan met kaba biang ha Shella khnang ba ki nongjngi kin ioh ban pyndonkam iaka.”
