Shillong, Iaiong 18 : U Symbud Myntri Rangbah Bah Prestone Tynsong ha ka sngi Saitjain, ula ong ba ka Sorkar ka long kaba kloi ban iakren bad ka Green Tech Foundation, kiba ki nongialam kila shong shah thngan halor ka jingdawa ban pynduh pyndam ia ka jingtyrwa ban tei ia ka project kam jngohkai bad aiwai 60 snem ia ka dewlynnong Lumpongdeng.
“Ngi la iohi ba ki nongialam ka Green Tech Foundation ki dang iai bteng ban iakhih. Ngam lah ban khang ia ki. Ngim lah ruh ban pynbor ia ki. Hynrei kum ka Sorkar, nga kwah ban ong ha phi ba ka jingkhang jong ngi ka long kaba plie beit ban iakren” ong u Bah Prestone haba ai jingkren ha ka jingplie ia ka project ba palat T.100 klur ha Wahiajer, West Jaintia Hills.
Kane kala mih ruh shisngi hadien ba u Chairman ka GTF ula poi hospital namar ka jingshah thngan khlem pud sngi.
Ula pynshai ruh ia ki jingkynnoh halor ka jaka bad ong “Ki don mynta bun ki jingkynnoh ba ka Sorkar ka kwah ban die ia ka jaka. Phi iatip lut baroh ba ka project kan ieng ha ka jaka ka Sorkar, hynrei lada don kano kano ka jingsngewkhia, ngi long kiba kloi ban pynshai. Ngi la iasoi ia ka MoU ha ka lynti kaba shai bha. Phi lah ban ioh lyngba ka website bad ki kyndon kiba la buh”.
Haba kyntu ia ka jingiapyrshang lang na ka bynta ban kyntiew ia ki kam jngohkai, u Bah Prestone ula ong “Nga kyntu ia baroh ki nongshongshnong ka Jylla ba kin iatreilang khnang ba ka Shillong bad ka Meghalaya kin long kawei na ki jaka ba kwah wan eh ki nongjngohkai pyrthei ha kaba ki nongwan kai ki kwah ban pynlut ia ka por shuti jong ki”.
Ula maham pyrshah ia ki jingpyntip ba bakla. “Nhi la iohi ia ka roi ka par ha baroh ki liang hapoh ka Jylla. Hynrei lada don kito kiba pyrshang ban ialam bakla ia u paidbah, nga sngew ba ka project kaba dei ban pyndep tang hapoh shisnem lane arsnem, ka lah ban shim kham bun ka por”.
Halor ka synshar khadar, ula ong “Ka Sorkar ka kwah eh ban iatreilang bad ki nongshongshnong bad ki shnong ki thaw na ka bynta ka roi ka par jong ka Jylla. Nga ym kyntait ba ki don ki khep ba ki don ki jingduna ha ka jingbha ki kam ba trei. Kumta, ngi donkam ia ki paidbah ba kin ai jingmut ban pynthikna ba ki project kin ai jingmyntoi ia ki paidbah bad ia ka Jylla baroh kawei.
