Tura, Iaiong 18 : U Myntri Rangbah ka Jylla Conrad K Sangma ha ka sngi Saitjain, ula pynkup burom ia ki khynnah kiba pass bha shakhmar ha ka eksam SSLC 2026 na ri-lum Garo ha ka jingialang kaba long ha Iingsah jong u ha Tura, haba iaroh ia ka jinglehbha jong ki ha ka jingpulebad kyntu ba kin long kiba skhem bad ba iai shah ha ka jingim.
Ia kane ka jingialang la pynlong ban ai jingithuh ia ka jinglah lehbha jong ki khynnah skul ha kae ka eksam SSLC ba dang shu dep, ha kaba u Myntri Rangbah ula aikhublei ia ki topper namar ka jingtrei shitom, ka jingaiti, bad ka jingdon ia ka mynsiem ialeh. Ula ong ba ka jingjop jong ki ka wanrah ia ka jingsngew sarong ym tang ia ki iing ki sem jong ki hynrei ia ka thain baroh kawei bad ka Jylla.
Haba kren sha ki khynnah pule, u Conrad ula ai mynsiem ia ki ban iai bteng ha kaban leh bha bad ban pynleit jingmut sha ka thong ba ki don. Haba ban jur ia ka bynta jong ka pule puthi ha ka jingpynwandur ia ka lawei ka Jylla, ula kyntu ia ki ba kin noh ia u synniang ba don jingmut sha ka imlang sahlang lyngba ka jingstad bad ka sap ba ki don.
Ia ki topper lah ai sngewbha da ki syrnot bad ki song pisa kum ka dak ka jingai mynsiem ha kane ka prokram.
Ha kane ka jingialang la wan ban iashimbynta da ki Kmie Kpa, ki Nonghikai bad ki nongkitbok kitriang, kiba la ai ka jingiaroh iaka jingjop jong ki khynnah pule bad iaroh ruh ia ka jingiai bteng ka Sorkar ban pynleit jingmut ha ka pule puthi bad ka roi ka san ki samla.
