Shillong, Iaiong 16 : U Myntri Rangbah ka Jylla Conrad K Sangma ha ka sngi Palei, ula pynbna ba ka Kynhun Myntri ka Sorkar kala ai jingmynjur ia ka Meghalaya Official Language Ordinance, 2026, ka ban pynkut noh ia ka Meghalaya State Language Act, 2005, ban pynlong ia ka ktien Khasi bad Garo kum ka Official Language ka Jylla nalor ka English.
“Ka Kynhun Myntri (hynne ka sngi) kala shim ia ka rai ban sah khana bad ba kongsan da kaba mynjur ia ka Meghalaya Official Languagres Ordinance 2026, ka ban pynkut noh ia ka Meghalaya State Language Act 2005, ka ban nang pynbha ia ka jingtreikam treijam baroh bad kumjuh ruh ki lad ki ban plie khamtam ia ki samla jong ka Jylla bad kan iarap haka ban kyntiew ia ka ktien ka thylliej jong ngi” ong u Conrad hadien ba dep pyniaid ia ka jingialang ka Kynhun Myntri.
“Hapoh kane ka Meghalaya Official Languages Ordinance 2026, ka mat ba kongsan hi ka long ba nangne shakhmat nalor ka ktien English, ka ktien Khasi bad Garo ruh kin long noh ki Official Language jong ka Jylla” ula bynrap.
Kat kum ka jingong jong u, kane ka sienjam kan nang pyniar ia ka jingpyndonkam ia kine ki ar tylli ki ktien ha ka jingpyniaid kam ka Sorkar bad ka synshar khadar.
‘Da kane ka rai kaba kongsan, kane kan pynsted ha kaban pyndonkam ia ka ktien Khasi bad Garo ha kiba bun ki shithi bad ki jingthoh bap hah ka Sorkar bad ruh ha ki por ban wan” ong u Conrad.
U Myntri Rangbah u pyntip ba ha ka por kaba biang, yn sa wanrah ruh ia ka jingpynkylla ia ki Ain kiba iahap bad kane, kum ka Meghalaya State Legislature (Continuation of the English Language) Act, 1980.
“Shisien bala pynkylla, kan ailad ia ki nongthaw ain jong ngi ba kin kren bad iatai nia ha ka ktien Khasi bad Garo nalor ka English ha ki Dorbar jong ka Iingdorbar Thaw Ain” ula ong.
U Conrad u iathuh ba kane ka rai kan treikam ruh na ka bynta ki competitive examination. “Kane ka rai kan plie lynti ruh ha kaban pynlong ia ki eksamin bapher bapher ha ka ktien lajong jong ngi-ka ktien Khasi bad Garo nalor ka English” bad bynrap “Hynrei, ka jingpyntreikam, kan iaid da ki bynta bynta”.
“Kane, hooid kan ym jia mar mar. Ka jingpynkhreh ia ki jingdonkam baroh kan shimpor. Kin don ki rai kiba suk ban pyntreikam mardor hynrei ki don ruh ki rai kiba donkam ia ki jingpynkhreh, ki briew kiba hap thung bad ki jingtei kiba donkam, ki rules ba hap thaw. Hynrei kumba nga ong, kane ka rai mynta ka sngi kan ailad ia kine kiei kiei baroh ba ki don” ula pynpaw.
U Myntri Rangbah ula pyniasnoh ia kane ka Ordinance bad ka jingdawa bala slem bha jong ka Sorkar ban ai jingithuh ia ka ktien Khasi bad Garo ha ka Eighth Schedule.
“Ngi la leh ruh ia kane namar ka resolution ban kynthup ia ka ktien Khasi bad Garo ha ka Eighth Scheduled la shim da ka Iingdorbar Thaw Ain bad ka Sorkar ka sngew jur ba katba ngi dang dawa ia ka Eighth Scheduled, ka long kaba kongsan ba hapoh ka Jylla jong ngi hi, ngi dei ban shim ia ki sienjam kiba donkam ban pynlong ia ka ktien Khasi bad Garo kum ka ktien ba pyndonkam ka Sorkar ne Official” ula ong.
“Kane kan dei ruh ka khubor ban phah sha ka Sorkar India bad sha ka Parliament bad kan nang plie lynti shuh shuh ia ngi ba ngin nang khmih lynti ba ka ktien Khasi bad Garo kan shah kynthup noh ha ka Eighth Schedule. Kumta, kane ka dei kawei ka sienjam ba kongsan ba ngin kynjoh ia ka thong” ong u Conrad.
Halor ka jingpyndonkam, u Conrad u Pynshai ba ka English hi kan iai long ka ktien pyniasoh lang. ‘Ka jingpynbna ha ka gazette bad ki hukum kiba mih na ka Sorkar Meghalaya kan dei noh ha ka English, Garo bad Khasi….kumta yn pyndonkam noh ia baroh lai tylli ki ktien” ula ong.
Halor ka jingdawa ban pynrung ha ka Eighth Scheduled, u Myntri Rangbah ula pyntip ba ka rai hi ka shong ha ka Sorkar Pdeng.
