Shillong, Iaiong 16 : Ka kynhun Myntri ka Sorkar Jylla ha ka sngi Palei, kala ai jingmynjur ban seng ia ka Greater Shillong Waste Management Agency bad ban register ia ka kum ka Society.
Hynrei ula ong pat, ka jingshakri jong kane ka Agency kan nym long kaba hap ban leh beit (mandatory) hynrei yn ai jingshakri tang halor ka jingkyrpad na ki Shnong ki Thaw.
Haba iakren bad ki lad pathai khubor, u Myntri Rangbah Conrad K Sangma ula iathuh ba ia kane ka rai la shim hadien ka jingiasyllok ha kylleng ki jaka jong ka sor.
“Ka long kaba donkam bha ban seng ia ka Greayer Shillong Waste Management Agency. Ia kane la leh hadien ka jingiasyllok bad kumba 100 tylli ki shnong kiba don hapoh ka Greater Shillong, kaba don kumba 288.5 square kilometer, lada ngam bakla, baroh kine ki jingiasyllok kila long ha ki shnong bapher bapher” ong u Conrad.
“Ka jingnang heh jong ka sor kala iaid sted palat ia ki rukom lum ia ki jaboh jabain namar ka jingnang phiah ia u pud u sam. Kumba phi iatip, ka Shillong kala nang heh bad ka jingkylla sor kala iaid sted bha hynrei ka rukom lum ia ki jaboh jabain la leh da ki agency bapher bapher ha kylleng ki jaka namar ka jingdon da u pud u sam bad ki bor treikam bapher bapher. Ki bor treikam kum ka Contonment Board ka khmih ia ki jaka Contonment, ka Municipal ka khmih ia ki jaka Municipal bad ki jaka ba shabar ka Municipal ki hap hapoh ka Sixth Scheduled bad ki hap hapoh u pud ki District Council. Kumta, ka ju don beit ka jingduna ha ka jingiatreilang bad ka jingbym biang ka rukom treikam kaba lam sha ka jinglum ia ki jaboh jabain ban nym don ha u pud ba baroh ki iakwah” ula ong.
Halor ki jingpynsngew bala ioh pdiang, u Myntri Rangbah ula ong “Ka jingiasyllok kala iaid bad ki Shnong bapher bapher bad kila ai ia ka jubab jong ki bad bun na kine ki shnong kila ai ia ka jubab kaba sngewtynnad”.
“Ngi lah shim ruh ia ka jingkynthoh na ki District Council, khamtam ka KHADC bad kiwei kiwei ki Tnad, kiba la buh ia katto katne ki jingkyllibad kumno ka District Council kan iadonbynta lang, nym iadon bynta lang bad ngi la pynshai sha ka District Council halor kane ka bynta” ula ong.
