Guwahati, Iaiong 16: U Myntri Rangbah ka Assam Himanta Biswa Sarma ha ka sngi Palei u la iathuh lypa ba ha kane ka Elekshon MLA, ka NDA kan jop 100 seat ha Assam bad 200 seat ha West Bengal.
U Sarma, uba dei uwei na ki snar ialap election ha Bengal, u la leit ban ialap elekshon ha Bengal hadien ba BJP ka la bynshet ha u ia ka jingkitkhlieh na ka bynta ka elekshon ha Bengal.
Haba kren ha ka rally ha Alipurduar, u Sarma u la ong ba ka jingpyrrkhing ia ki jaka ha khappud kala treikam mynta ha Assam bad Tripura, bad u la ong ba ka jingleh kaba kum kane ka donkam mynta sa ha West Bengal.
“Ngi la shim ia ki sienjam ban khang ia ki khappud jong ka Assam bad ka Tripura.Ka jingdonkam jong ka por ka long ban khang sa ia ka khappud ha West Bengal,” la ong u Sarma.
U Sarma, u ong ba ka jingkylla ha ka jingbun briew, ka dang iaid ha West Bengal, namar ka jingwan buhai shnong be-ain, bad ula kam ruh ba ka jingbun briew jong ki Hindu, ka nang hiar ha katei ka Jylla, katba ki Muslim na Bangladesh, ki la nang kiew.
Ki nongialam ba paw kiba kynthup ia ki myntri sorkar u Pijush Hazarika, u Jayanta Mallabaruah, u Ranjeet Kumar Dass, u Bimal Bora, u Dr. Ranoj Pegu, u Rupesh Gowala, u Kripanath Mallah, u Rajdeep Roy, u Krishnendu Paul, u Kaushik Rai, ha ryngkat bad u Member of Parliament u Parimal Suklabaidya, lem bad kiwei de ki MLA bad ki heh party kila ia don ha kylleng ki constituency ban pynkhlain ia ki jingialap ne campaign election.
Ka election sha ka iing dorbar jong ka West Bengal kaba don 294 ngut ki dkhot kan long ha ki ar bynta ha ka 23 tarik u Iaiong bad ka 29 tarik u Iaiong bad yn niew ia ki vote ha ka 4 tarik u Jymmang.
