Shillong, April 15: U Myntri Rangbah ka jylla u Conrad K Sangma hynne ka sngi Balang, ula plie ia ka jingkyntiew kyrdan ia ka RMSA School kaba don ha Mawlieh, West Khasi Hills, kaba pyni ia ka jingshimkhia ka sorkar ban pynkhlain ia ka pule puthi kum ki paia jong ka roi ka par kaba salonsar.
Ha kane ka jingplie la iadonlang u Myntri ka pule puthi u Bah Lahkmen Rymbui, ki MLA kiba kynthup ia u R.G Momin bad G Wahlang bad ki heh ophisar jong ka district.
Haba kren ha ka jingialang, u Conrad Sangma ula ong, ba ka sorkar ka phaikhmat bha ban pynthikna ba ka roi ka par kan poi sha man la ki nongshong shnong, da kaba phaikhmat kyrpang ha ki bynta kiba iadei bad ka imlang sahlang kum ka pule puthi. Ula pynshai ia ka jingdonkam ban pyniasoh ia ki shnong ki thaw, kolshor bad ka riti dustur ha ka jingiaid lynti ka jylla ha ka roi ka par.
“Ka jingkynshew tyngka ha ki samla bad ha ka pule puthi kadei u shabi jong ka jingpynneh pynsah ia ka roi ka par. Kam dei tang halor ka jingtei ia ki jingtei hynrei ban pyniasoh bad man la ki rai da ka jingiohi jngai na ka bynta ka jylla” ula ong.
U Myntri Rangbah ula pynpaw ia ka jingsngewhun bad ka jingtei kaba thymmai jong kane ka skul bad ula kyntu ia ki nonghikai ba kin ithuh ia la ka kamram ha kaban saindur ia ka lawei jong ki khynnah pule.
“Man la ka khyllipmat kaba phi pynlut por bad ki khynnah pule, ka don ia ka bor ban batai ia ka lawei ka jongki. Peit jngai ia ki jingtynjuh bad pynleit jingmut ha ka bynta kaba iar kum ki nongai jinghikai” ula bynrap.
Ula kyntu ia ki khynnah pule ba kidei ban suidniew ia kine ki jingtei kiba thymmai bad ka pynpaw ba bun ki skul ha ki thain nongkyndong kim da bit da biang ha ki jingdonkam ki jongki.
“Shim ialade ba phi dei kiba donbok bad trei shitom ban pynlong bad leh katba lah ia ki kabu kaba phi ioh” ula ong.
Ka RMSA School Mawlieh kadei kaba la sdang ha u snem 1961 bad la seng ia ka kum ka jaka pule shimet da ka jingiatreilang hapdeng jong ki 7 tylli ki shnong ban pyniar ia ka pule puthi ha ka thain. Hynrei katba ba nang mih ki snem, kala kylla kum ka Government Upper Primary School hashwa ban kyntiew noh ia ka sha ka Secondary Level hapoh jongka Samagra Shiksha programme ha u 2014–15 ban tehlakam ia ka jingiehnoh shiteng por ki khynnah ia ka jingpule.
Ban kyntiew shuh shuh, ia kane ka jaka pule la kyntiew sha ka Higher Secondary School ha u samoi pule jong u snem 2023–24, ha kaba la buh ia kane ka jaka pule kum ka shlem pule kaba kongsan ia ki khynnah jong ka thain Rambrai, West Khasi Hills.
