Shillong, Iaiong 15: U MLA ka UDP na Mawsynram constituency Bah Olan Sing Suin u la tyrwa ban tei daka Pitcher Plant Garden ha Lawbah, da kaba pynpaw ba katei ka projek kaba kyrpang ka lah ban kyntiew shibun ia ka kam jngohkai pyrthei ha katei ka thain Mawsynram.
U Bah Suin u la ong ba u la dep ban iakren ia kane ka jingtyrwa bad u Myntri Rangbah ka jylla.
“Nga don ka jingtyrwa kaba thymmai ruh na ka bynta ban pynroi ia ka kper Pitcher Plant daka ba tei iaka Pitcher Plant Garden ha Lawbah. Nga la iakren bad u Myntri Rangbah ia kane ka projek kaba kyrpang ban pynroi ia ka kper thung Pitcher Plant” u la ong.
Haba pynpaw ia ka jingdon ki Pitcher Plant hapoh ka thain, u Bah Suin u la ong ba katei ka thain ka don jingkyrmen ban kyntiew iaka kam jngohkai pyrthei.
“Lada phi iaid lyngba ka surok na Mawlaishong sha Lawbah, phin sa iohi ba ha baroh arliang jong ka surok ki don shibun ki Pitcher Plant kiba mih bad lada lah ban pynroi ia kane kum ka kper jingthung, Pitcher Plant nga tharai kan long ka jaka kaba kyrpang ha kaba iadei bad ka jingpynroi ia ka kam jngohkai pyrthei” u la ong.
U la maham ba kine ki jait syntiew ki lah ban duh jait lada ym iada ia ki.
“Hooid, kin sa don ha ka jingma lymda ngi sumar bha ia ki namar ka jingsdang seng shnong hapoh ka thain bad namar ka jingdon ka jingpluh ding. Nga tharai ba une u pitcher plant un long uba kyrpang ha Meghalaya lada ngi lah ban pynroi ia u,” u la bynrap.
Haba pynpaw ia ka jingangnud jong u na ka bynta ka constituency, u MLA ula ong “Nga kwah ban iohi ba ha kawei ka sngi ka Mawsynram kan ioh la ka jong ka kper thung pitcher plant”.
Haba ïanujor ïa ka Mawsynram bad ka Sohra kum ka jaka jngohkai pyrthei kaba heh hapoh ka Jylla, u MLA u la ong ba ka jingbym biang ki surok ka la khanglad ban kyntiew iaka kam jngohkai pyrthei.
“Haba ïanujor bad ka Sohra, ka Mawsynram ka dang long kaba duna eh namar ka jingbym biang ki surok. Kumta shisien ba la pynbha ïa ki surok nga ïohi ba ka Mawsynram ruh kan ym long kaba ar hadien ka Sohra haba ïadei bad ka kam jngohkai pyrthei,” u la pynpaw.
Halor ka jingkylli hato katei ka thain Mawsynram ka la shah iehnoh bein ne em, u MLA u la ong ba u la shim ia ki sienjam kiba shimkhia naduh ba la jied ia u kum u MLA ka thain.
“Nga lah ban ong namar ba nga la shim khia ha ka por ba nga shah jied kum u MLA, nga dang pyrkhat ba nga dei ban leit sha ka Sorkar namar shisien ba ngi la pyrkhat, ngi dei ban leh. Kumta, nga dei ban leit sha ka Sorkar ban shimkhia. Nga sngewkmen ba ka jingkylla kaba thymmai ka jia ha ka por ba nga long MLA” u la ong.
