Shillong, Iaiong 15: U MLA ka seng UDP na Mawsynram bad dkhot ka Meghalaya State Planning Board (MSBP) Bah Olan Sing Suin ula ong ba ka kamram jong ka Board ka long ban pynthikna ba ki tnad sorkar ki dei ban pyntreikam ia ki scheme ha ka lynti kaba dei ym ban ai jaka riehtngen ia ki politician.
Haba iakren bad ki nongpathai khubor hynne ka sngi Balang, u Bah Suin ula ong, ba ka Board ka iakynduh man la ka por hapoh ka jingialam jong u Chairman u AT Mondal ban khmih bniah ia ki prokram jong ki tnad sorkar.
“Ngi lah lum arsien ia ka jingialang bad khmih bniah ia ki prokram kiba la pyntreikam da ki tnad sorkar, kiei ki jingduna bad ki jingeh kaba ki mad ha ka jingpyntreikam ia kitei ki projek. Ngi ai jingmut ia ka sorkar ia kaei kaba kadei ban leh ban pynbeit ia kitei” ula bynrap.
U Bah Suin ula pynshai ba ka Board ka treikam kum ka kynhun kaban ai jingmut.
“Ka Planning Board kam shim la pyntreikam eiei. Ngi ngim lah ban tuklar hynrei tang kawei ka long ba ngin ai jingmut ia ka sorkar ne ia ka tnad sorkar ba kan peit ia ki lad ne ki kabu kiba thymmai kiba ngi lah ban leh” ula ong.
“La pyndonkam ia ki Consultant da ki tnad kiba pyntrei ia ka kam hynrei ka Board kadei tang ka Advisory Committee”.
Halor ki jingkynthoh ba ka jingdon ka Board ka long ban ai jaka riehtngen ia ki politishan, u Bah Suin ula ong, “Lada ka Board kadei tang ka jaka riehtngen ki politishan, kumta kam long kaba don jingmut. Hooid, ngi lah shong bad pynwandur ia ki sienjam kiba dei ban shim ban peit ba ka jylla bad ki tand bapher kidei ban pyntreikam ia baroh ki scheme ha ka lynti kaba dei”.
U Bah Suin ula ong, ba kila don ruh ki riewstad kiba la donbynta ha ki kam jong ka Board, “Ngi lah donbynta, ki riewstad ruh kila donbynta lang ha ka Planning Board,” ula bynrap.
Ha kaba iadei bad ka jingdheng kali ha Shillong, u Bah Suin ula ong, ba kala don ka jingbiang ha kine ki khyndiat bnai kiba la dep hadien ba la dep ban plie thymmai ia ki surok kiba thymmai.
“Ngi lah iakren bad ki pulit bad ka tnad kam pohiing ban pynduna ia ka jingdheng kali ha nongbah Shillong. Mynta ka jingdheng kali ka lah shu biang haba ianujor bad ki 5-6 bnai kiba la dep” ula ong.
“Phi iohi ia kane ka surok kaba leit sha Anjalee petrol pump, ia kane ka surok kaba thymmai la dep ban plie bad kane kala iarap ha kaban pynduna ia ka jingdheng kali bad la lah ban law ia ka sohkyrdot. Phi iohi ba na Upper Shillong sha Umshyrpi, ka surok mynta kadei kaba lah jan dep, kumta ngi iohi ba ka jingiaid ki kali kala sdang ban biang” ong u Bah Suin.
Haba pynpaw ia ka jingshem shimet ka jongu, ula bynrap “Man la ka por ba nga leit nangne sha Upper Shillong ka shim por shi kynta hynrei mynta ka shim por eh tang 15 ne 20 minit. Nga iohi ba ha kane ka shi bnai ia ka jingiapher ha ka jingdheng kali haba ianujor bad ki 4-5 bnai kiba la dep”.
 Bah Olan Sing Suin ula ong ba ka kamram jong ka Board ka long ban pynthikna ba ki tnad sorkar ki dei ban pyntreikam ia ki scheme ha ka lynti kaba dei ym ban ai jaka riehtngen ia ki politician.){kind=link}