Shillong, Iaiong 14 : U Myntri Rangbah ka Jylla Conrad K Sangma ha ka sngi Ba-ar, ula pyniaid ia bun tylli ki jingialang ha Tara Ghar State Guest House, ban bishar ia ka jingiaid ki prokram bapher bapher bala shim da ka Sorkar da ka jingthmu ban pynkhlain ia ka jingdon ki jingtei ba kongsan bad ka jingai jingshakri ha ka Jylla.
“Ngi la shong ia bun tylli ki jingialang ba iadei bad ka jingpynitynnad bad ka jingkhuid jingsuba nalor ki project pynroi sor ha Shillong, Jowai bad Tura” ong u Conrad.
“Ka dei shaphang kumno ba ngin nang lah pynbha, kumno ba ngin pyniadon bynta lang ia ki shnong ki thaw, kyrshan ia ki shnong ki thaw, bad iatreilang bad ki shnong ki thaw ban pynthikna ba ka jingkhuid jingsuba ha Shillong kan kham biang, ka jingbret ia ki jaboh jabain kan kham biang bad ka jingpyntuid ia ki umjakhia ruh kan kham biang” ula ong.
Ka jingialang kala iakren ruh halor ka jingpynkhreh ia ka National Games ha kaba u Myntri Rangbah ula shong bishar ia ki jingtip ba bniah halor ki jingtei, ki jaka sah, ki kali ban kit ia ki nongialehkai bad ki jingpynpoi marbam.
“Ngi la iakren ia baroh kiei kiei la ka dei ha ki jingtei, ki jaka sah, ki kali ban pyndonkam, ka jingdon ki nongialehkai ki ban wan, ki jait jingialehkai bapher bapher, ha kino ki jaka ba kin long bad ter ter” ula ong.
Ka jingiakren ba kham kongsan eh ka kynthup ia ka jingtyrwa ban seng ia ka Centre of Excellence na ka bynta u Agar ha Meghalara, ha kaba ula pynpaw ba ka Jylla ka iohi ia ka lad kaba bun bah ha kane ka bynta.
U Myntri Rangbah ula shong bishar kam ruh halor ka jingtreikam ka Tnad Forest,haba pynleit jingmut halor ka jingpynmih pisa bad jingpynjanai ia ka jingshakri.
Nalor kane, u Conrad ula shong jingialang ruh bad ka Meghalaya Transport Corporation (MTC) ban iakren halor ki lad ki lynti ban pynjanai ia ka rukom pyndonkam ia ki jingdon jingem ba ka don.
