Nongstoiñ, Ïaiong 15 : Ka kynhun ki Nepali ha ka sngi Ba-ar, la kynnoh ba kila leit thombor ha ka shnong Mawsikar, bad jynrat naphang ia ki jingthung jingtep jong ki paid Khasi ha kane ka shnong, kaba don markhap bad ka Langpih, West Khasi Hills.
Ia kane la pyntip da u Organising Secretary ka VPP Rambrai Robert Wahlang haba iathuh ba ma u lem bad u MLA barim ka Nongstoin Bah D Jyndiang nalor kiwei ki rangbah, kila sakhi dalade ia ka jingleh donbor jong ki Nepali ki bym shym la patiaw satia ia ki Khasi kiba don ha ki jaka rep ha Mawsikar.
Uiathuh ba ki nongrep kiba dei ki Khasi, kila bitar jur halor kane ka jingwan leh donbor ki Nepali hynrei da ka jingwan poi kloi u Police Incharge ka Langpih Border Outpost, la lah ban tem noh ia u paidbah/
U iathuh ba une u heh Pulit ula shimkhia bha halor kane ka jinglong jingman bad ia ki lad jingiada na ka bynta ki nongrep kiba don ha katei ka jaka.
U Bah Robert ula kynnoh ba une u Heh Pulit u ju pyntip sha ki bor ba kham halor haba jia kum kine ki jingjia ha khappud hynrei kam ju don satia ka jingshimkhia.
