Kyntait u CM ia ki jingsngewkhia ka GTF | Ym don jingtei satia ha dewlynnong Lumpongdeng

Shillong, Iaiong 15 : U Myntri Rangbah ka Jylla Conrad K Sangma ula pynthikna ba kan nym don ka jingiakren bad ka kynhun Green Tech Foundation (GTF) kiba iakhih pyrshah ia ka jingthmu ban tei ia ka Taj Umiam Resort & Spa ha Umiam, haba pynpaw ba ki jingsngewkhia jong kane ka kynhun ka dei kaba la dep ban pynbeit.

“Ka jingpyntrei ia ki jingtei kan long ha ka jaka ba ieng ka Orchid Lake Resort ba mynta, bad ka sawdong sawkun bad ka mariang hapoh ka dewlynnong kan long beit kumba ju long” ong u Conrad.

Ula ban jur ba kan yn ym shah satia ban don kano kano ka jingtei kaba neh shirta hapoh ka dewlynnong, lait noh tang kiba shipor, ki jingtei ki bym pynjot ia ka mariang ki ban tei tang na ka bynta ki katto katto ki jingialang ba kyrpang (event).

U Conrad ula pynpaw ia ka jingsngewsih ba ka GTF kam pat hun satia ia ka jingkular jong ka Sorkar bad ong “Ka long kaba sngewsih ba kim pat sngewhun namar kane ka dei ka jingshisha halor kane ka kam”.

Haba kylli la ka Sorkar kan khot ia ka GTF sha ka jingiakren, u Myntri Rangbah ula ong “Ka jingsngewkhia jong ki ka long ba ka jingtei ia ka hotel kan long ha ka dewlynnong…..nga la kren shai ba kam don satia kaba kum kane ka jingthmu, kan ym don satia kano kano ka building ban tei ha katei ka jaka, ka dewlynnong hi kan iai long kumba ka ju long, kane ka kam kala shai kdar, ngam iohi ia kano kano ka jingkulmar jingmut ha kane ka bynta”.

Halor ka jingkynnoh ba pom dieng, u Conrad ula ong ba kane ka dei ka kam jong ki riew shimet, haba pynpaw ba ka kompani kaba don bynta bad ka project, kam donkti satia ia kane ka kam.

“Ki Pulit kila dep pynshai ba ki don ki riew shimet kiba donkti, ym ka kompani..kam don bynta eiei ruh em bad ka proj”ct” ula ong haba kyntu ia ki nongshongshnong ba kan nym don satia ka jingpynjot ia ka dewlynnong.

Ula kyntu ia ki nongiakhih ba kin iatreilang haba pynpaw ba ka project hi ka thmu ban kyntiew ia ki kam jngohkai hapoh ka Jylla.

Ka GTF kala don hapdeng ka jingiashah thngan ba khlem pud naduh ka 8 tarik Iaiong, haba dawa ban pynsangeh noh ia ka project namar ka jingsngewkhia iaka jingjot ka mariang.

U Chairman ka Foundation H Bansiewdor Nonglang ula pyntip ban bteng beit ia ka jingiakhih tad haduh ba ka Sorkar kala ai ia ka jingkular da ka jingthoh ba ia kane ka project la pynduh pyndam noh.