Kynnoh ki Sengbhalang ba thombor ki Pulit ia ki Nongialam hadien ka jingiakynad Jaidbynriew

Shillong, Iaiong 14 : Khatwei tylli ki kynhun Sengbhalang ha Dadenggre, kila aiti ia ka jingujor sha u Sub-Divisional Officer (Civil), ba kynnoh thombor da ka jingthmu ia ki nongialam jong ki bad ka jingbym iaid kat kum ka lynti ba dei da ki bir Pulit hadien ka jingkulmar kaba mih na ka jingiakynad pher Jaidbynriew ba dang shen ha ri-lum Garo.

Ha ka shithi ujor ba 14 tarik Iaiong, ki nongialam Sengbhalang ba kynthup ia ka Garo Students’ Union, FKJGP, AAYF, bad A’chik Youth Welfare Organisation, kila pynpaw ia ka jingsngewkhia halor ka jingujor ejahar pyrshah ia ki nongialam Sengbhalang khlem ki sakhi satar kiba thikna.

“La ioh jingtip ba ki nongialam sengbhalang kila shah jer kyrteng ha ka ejahar ba iadei bad ka jingpynjulor ia ki nongkynti paidbah” ong ka shithi ujor.

Kila kdew ia ka case kaba ki nongialam sengbhalang kiba shah khot hajir ha Dadenggre Police Station myn ha ka 11 tarik Iaiong haba pynshong nongrim ia ka ejahar bala register hapoh ki kyndon ka BNS bad ka MMPO.

“Ka jingkhot hajir bad ki jingkynnoh ki paw kum kiba pynshong nongrim na ki jingkren mano re mano ha ka jaka jong ki sakhi satar, lane ki jingiathuh ki nongsakhi” ong ka shithi ujor.

Kila kynnoh ruh ba kine ki nongialam ba shah khot hajir kila hap ban leit leh ia ka medical examination watla kim pat shym la shah kem.

“Kat kum ki kyndon treikam, ia ka medical exam la ju leh hadien bala kem ia ki briew” kila ong haba khot ia kane kum ka jingpynkhein ia ka hok tynrai bad ka jingleh ba shu jied briew haba ujor ia ka ejahar bad khot hajir ia ki nongialam, kaba la wanrah ia ka jingsheptieng bad jingduh ia ka jingshaniah ha ki bor synshar district.

Kila bynrap “Ka dei kane kaba ki bor district ki siew kylliang ia ka jingshakri jong ki kynhun sengbhalang ha Dadenggre” haba ban jur ia ka bynta jong ki sengbhalang ban pynneh ia ka jingsuk ha ka thain.