Shillong, Apr 14: Ka jingap khmih ia ka 5th Meghalaya State League (MSL 5) kan urlong noh, ha kaba kane ka lympung iakob ialehkai kan sdang lashai ka sngi Balang da ka jingiakhun plie pyrda hapdeng ka Nongkseh SSCC pyrshah ia ka Khimusniang SC. Kane ka jingiakhun kan long ha ka por 5 baje janmiet ha SSA Stadium, Polo bad ia ki tiket lah ban ioh na kane ka jaka.
Ia kane ka jingiakhun kaba heh ha ka Group A yn pynialehkai da ka jingpynmeh ia ki ‘Floodlights’ ha kaba bun ki riewieid football kin wan ban sakhi ia kane ka jingiakhun ha kane ka stadium.
U Myntri ka tnad Sports and Youth Affairs u bah Wailadmiki Shylla yn wan ban plie ia kane ka jingiakob kum u kongsan.
Ka Nongkseh kadei kawei na ki Club kaba baroh kin phaikhmat bha na ka jinglah ka jongka ban kiew bad ban jop ia ki jingiakhun ha u snem 2025, ha kaba kala long ka lahduh ha ka First Division bad ka Champions Cup jongka Shillong Sports Association bad ia ka Sikkim Gold Cup ha u Kyllalyngkot 2026.
Ka Khimusniang kan pyrshang ban iakhun tyngeh ban ialeh ban khur ia ka jingjop ha ka jingsdang iakhun mynta u snem, hadien ba kala iohrah ia ka nam lahduh jongka Kiang Nangbah Memorial Trophy kaba la pynlong da ka West Jaintia District Sports Association’s Super Division 2025.
Ka Khimusniang kan pyrshang ban leh kumba la leh da ka club jongka WJDSA kaba la tip kum ka Niaw Wasa United kaba la jop ha ka sngi plie pyrda ia ka MSL ha u 2017-18.
Kane kan dei ka sien kaba nyngkong ia ka Nongkseh bad Khimusniang ban iashimbynta ha ka MSL, kaba dei ka rynsan iakob jong ka MFA kaba ioh ia ka jingkyrshan kaba pura na ka sorkar jylla lyngba ka Directorate of Sports and Youth Affairs naduh ba la sdang ia kane ka lympung iakob ialehkai football ha ka jylla.
Kala long ka jingiakob kaba ki nongjop kila bteng ban iaknieh ban rah ia ka nam lahduh bad ha kine ki 4 snem kiba la dep la sakhi ba kala don ka jingkylla ha ka jingrah ia ka nam lahduh ha kaba ka Niaw Wasa United kala jop ha u 2017-18, Shillong Lajong (2019), Rangdajied United (2023) bad ka Mawlai (2024-25).
Ha ka 5th Meghalaya State League (MSL 5), kin don baroh 33 tylli ki kynhun na kylleng ki bynta ka Meghalaya kiban iakhun ha ki 8 tylli ki Group ban iaknieh ban ioh rah ia ka nam lahduh ia ka MSL mynta ka snem.
