Dibrugarh, Iaiong 13: Ki nongshongshnong ka Jerai Gaon, Chabua kila rit mynsiem bad her syrngiew na ka jingsawa ktang suloi hajan ka iing sah u Chairman ka ULFA-I Paresh Baruah hadien ka por shiteng miet.
Kane ka jingjia kaba la jia ha ka por 12:30 baje mynstep, ka ba la mih ka jingpyrkhat hapdeng ka jingkynnoh ba ka lah ban don ka jingiadei bad ki jingjia kiba dang shen ha katei ka thain. Ia kane ka kam la leh da ki briew ki bym lah satia ban ithuh, kiba la siat haduh arkuli sha suin ha katei ka jaka.
Lah ban kdew ba u Arunodoi Dohotia- uba la tip ruh kum u Arunodoi Asom bad u nongiarap barim jong u Baruah- u la wanphai biang sha ka jaka sah jong u ha katei ka jaka tang ar sngi mynshwa hadien ba la iathuh ba u la mih na ka ktem jong ka ULFA-I ha Myanmar katto katne bnai hadien ka jingpyndem wait noh ialade.
Haba pynthikna ia katei ka jingjia, u Bimal Baruah, u hynmen rangbah jong u Paresh Baruah, u la iathuh ba u la iohsngew arsien ki jingbthei ka ktang suloi hajan katei ka jaka sah, wat la ym shym la don kano kano ka dur CCTV kaba la ioh ban ring ia katei ka kam.
“Ki riew runar u bym lah ban ithuh satia kila siat arsien sha suin hajan katei ka iing sah ha ka por 12:30 baje mynstep.Ym shym la ioh ban ring dur ei ei.Ki pulit ki la leit sha katei ka jaka bad sdang ia ka jingtohkit.Ka paw ba ki don kiba pyrshang ban pynthut ia ka suk ka sain”, u la ong.
Ki heh pulit ki la iathuh ba ka kynhun na Chabua Police Station ki la poi sha katei ka jaka tang hadien katei ka jingjia bad ki la pynlong ia ka jingtohkit.“Ngi dang lum ia ki dur na ki kor CCTV na ki jaka, hynrei haduh mynta ym pat ioh jingtip eiei.Ka jingpyrshang ka dang iaid ban wad bad kem ia kiba donkti”, la ong uwei u heh ophisar.
Ka United Liberation Front of Asom-Independent (ULFA-I), kaba la ïalam da u Paresh Baruah, ka dang iai long ka kynhun lehnoh kaba ïashim bynta ha ka jingïakhih kaba pyndonkam da kaba kieng atiar na ka bynta ban pynioh jinglaitluid ia ka Assam.
Ki nongshong shnong ki la ong ba kum kine ki jingjia ki ju jia ha ki por ba la leit ruh kumjuh.“Kane kam dei ka sien kaba nyngkong.Kum kine ki kam ki long ban pynmih ka jingpyntieng, pynsmiej ia ki paidbah bad kan pynthut ia ka suk ka sain ha kane ka thain”, la kynthoh uwei u nongshong shnong.
