Shillong Iaiong 13: U Nongtem na ka jaidbynriew Garo uba la wan hikai pyntbit na Vienna u Ambasal Cheran Momin ula pynshohbiej ia ki paitbah ha ka Nagaland String Orchestra kaba la long ha ka 10 tarik u Iaiong, kaba la long ruh ka khyllipmat kaba rah ia ka burom jong ka Meghalaya ha ka jingdonbynta ha ka tem ka put kaba iadei bad ka Classical Music ha ka thaiñ.
Ia kane ka Concert, kaba la ai kyrteng “You’ll Never Walk Alone,” la pynlong ha Bundrock Auditorium, Patkai Christian College ha Chümoukedima bad hadien kane la pynlong ha G. Rio Auditorium ha Kohima, kaba la khring ia ki nongpeitkai bad ia ki riewieid ia ka tem ka put kaba la pyni shai kdar ia ka jingnang roi ka jingdon jingsngewtynnad ki paitbah ia ka Orchestra bad Choral Music ha ka thain shatei lammihngi jong ka ri.
U Cheran uba long u nonghikai ha ka tem ka put, uba tem ia ka Violin bad Double Bassist, ula pyni ia ka sap ka phong ka jongu kaba dei shibynta jongka Orchestra’s Double Bass Section, kaba pyni ia ka jingnang kiew ka jingdon ki nongtem kiba la ioh jinghikai pyntbit na ka thain.
Hadien ka jingioh jinghikai pyntbit na Vienna ia kaba la tip da baroh kum ka rynsan ha pyrthei ha ka Western Classical Music, u Momin ula pyninam ia ka rukom tem Orchestra kiba bun jait bad ha ki kyrdan ki bapher kiba la pynwandur katkum ka riti dustur ki briew jong ka dewbah Europe.
“Kane ka rukom iatreilang ka long kaba kongsan bha ban tei ia ka jinglong jingman kaba pura ha ka sawdong sawkun jong ka tem ka put ha ka thain shatei lammihngi” la ong u Momin haba iakren bad Ka Shlem, ryngkat ka banjur ia ka jingdonkam ban long kiba ryntih bad ka jingai jinghikai kaban iai neh ha ka Orchestra.
Ia kane ka concert, la pynlong da ka Nagaland String Orchestra bad ki nongrwai jongka MSSM, kaba la khring ia palat 800 ngut ki nongpeitkai ha Dimapur bad kumba 400 ngut ha Kohima.
Haba phai sha Meghalaya, u Momin u dang trei ban tei ia kane ka jinglong jingman. Kum u Artistic Director of Venia Academy of Performing Arts and Music, ula ai jinghikai ia ki nongtem kiba dang samla bad kyntiew ia ki jingtem da ki ksai ne ‘String’ kum ka jingioh jinghikai bad ka kabu ban shim kum ka jingkamai jakpoh.
Ula don ruh ia ka thong ban kyntiew ia ka Orchestra bad ban thaw ia ka rynsan kaban pyniasoh ia ki nongtem nongput ka thain shatei lammihngi ka ri bad ki kabu kiba don shabar jongka.
