Nongpoh, Ïaiong 07: Arngut ki samla kynthei na Ri Bhoi District, ki la lah ban tynshain bha da kaba ioh rung ha ka thup top 20 jong ka result ka eksam Secondary School Leaving Certificate bala pynbna da ka Meghalaya Board of School Education (MBoSE) ha ka sngi Ba-ar.
Kine ki ar ngut ki samla kynthei ki kynthup ia I samla Lasara Pynbiang Nongbri iba pule ha ka St. Michael Higher Secondary School, iba la ioh 568 marks bad wan ha ka kyrdan ba 8 bad i samla Daiakmen I Ka Talang na ka school Ferrando Higher Secondary School, Umroi Nongrah, iba ioh 555 marks bad wan ha ka kyrdan 20 jong ka thup top 20.
I samla Lasara Pynbiang Nongbri, ila pynpaw ia ka jingkmen halor ka jingjop ba ila ioh ha kane ka ekdam SSLC bad ong ba kam long satia ka jingpynkhreh kaba suk haba ai burom ia u Blei Trai Kynrad, ki Kmie ki Kpa, bad ia ki nonghikai kiba la kyrshan ia I na ka por sha ka por.
Ila ong ruh, ba ka dei ka jingminot bad ka jingtreishitom ha ryngkat ki nongkyrshan ba ila lah ban rung ha ka thup top 20 jong ka resol SSLC. Ine I Samla ila pynpaw ia ka jingangnud ban pule ia ka Science bad ruh ia ka thong ban pynkhreh ialade ban rung sha ka laiñ Medical.
I samla Lasara ila ai mynsiem ia kiwei ki para samla ba kin minot thop, treishitom bad iai kohnguh ia la ki kmie ki kpa bad ki nonghikai.
Katba i samla Daiakmen I Ka Talang, ila pynpaw ia ka jingkmen kaba khraw ban kot sha kane ka thong haba bynrap ba ka dei ka jingangnud jong i ban kot sha kane ka kyrdan namar ba ka dei ka sien kaba nyngkong eh ia ka school Ferrando Higher Secondary School ban don kiba kynjoh sha kane ka thup.
“Baroh hi ka dei ka jingtreishitom, ka jingiaishah bad ka jingkyrmen ia kaba bha tam kiba long ki lynti jam sha ka jingjop”, ong i samla Talang haba ai mynsiem ia kiwei ki samla pule ba kin don ia kajuh ka mynsiem haba ki thrang ban long eiei ha la ka jingim khamtam ha ki kyrdan pule bapher bapher.
Na ka liang i Principal ka St. Micheal HSS, Sister Aidalyne Sohkhlet, ila ai jingiaroh halor ka jinglah jong I samla Lasara bad ong ba ka dei ruh ka sien kaba nyngkong ia ka school ban pynmih ia ki khynnah kiba pass hapoh kane ka thup. Ila kitbok kitrwiang ruh ia I samla Lasara ba in nang kiew shakhmat ha ki kyrdan pule bad ban iaineh ha ka jingtreishitom.
Ka skul St. Micheal HSS, kum shibynta ban nang ai mynsiem shuh shuh ia i samla Lasara Pynbiang Nongbri, ka la ai syndon da ka song pisa kaba T.20 hajar ha ka programme pynkup burom ba la pynlong ha kane ka skul.
Ka Principal jong ka Ferrando Higher Secondary School, Sister Theresi Zoremsangi ka la ai burom kyrpang ia i samla Daiakmen iba la wanrah ia ka burom ia ka skul ha ka sien ba nyngkong eh. I iathuh ba ki nonghikai kila don jingkyrmen lypa ba ine i samla pule in kot sha ka thup jong ka top 20 namar ka jingminot bad jingtreishitom jong i.
 ha ka sngi Ba-ar.){kind=link}