Imphal, Iaiong 07: Ka jingkulmar ka la jur biang hapoh ka Jylla Manipur hadien ka jingiap jong ki 2 ngut ki khynnah bad ka jingmynsaw ka Kmie namar ka jingbthei bom ha Bishnupur district, ha kaba ki bor district ki la khang ia ka kor internet ha ki 5 tylli ki district.
Ka jingbitar jong ki paidbah ka la mih hadien ka jingïap noh jong ki 2 ngut ki shipara kiba dang 5 snem ka rta, kiba la mynsaw jur namar ka jingshah siat rocket-propelled grenade (RPG) ha Tronglaobi.
Katei ka jingjia, ka la wanrah biang ki jingïakhih kiba jur bad pakhang surok ha ki bynta jong ka Imphal, khamtam ha Sega Road bad Konjeng Hajari Leikai, namar ki nongshong shnong ki dawa ïa ka Iingbishar ba hok bad ki bor pahara kiba khlaiñ.
Ha Bishnupur district, la kynnoh ba ki paidbah kiba la bitar lep ki la leit tur ïa kawei ka ktem jong ki pulit Central Reserve Police Force (CRPF), da kaba kynnoh ba ki bor pahara (CRPF) kim lah ban ïada ïa ki paidbah.
Kane kala wanrah iaka jingkulmar kaba la pynlong ia ki bor pahara ban siat pynma ban tehlakam ia ki paidbah.
La iathuh ba katto katne ngut ki briew ki la mynsaw ha katei ka jing siat pynma ki CRPF bad la pynkit noh ia ki sha ki hospital Imphal, la iathuh ki tyllong khubor da sngew diaw ba lah ban don ka jingiap briew.
Ki bor district ki la ong ba ka jinglong jingman haka shong suk shong shngain kam long kaba shngain ha kaba ki jingïakhih ki nang jur ha kylleng ki jaka.
Haba iadei bad kane, u Lat ka Jylla Manipur u la hukum ban pynsangeh noh mardor iaka jingtreikam ka internet bad mobile data ha Imphal West, Imphal East, Thoubal, Kakching bad Bishnupur.
Ki heh ophisar ki la ïathuh ba kane ka sienjam ka long ban khanglad ïa ka jingpynsaphriang jong ki jingtip kiba bakla, ki jingthoh kiba pynkhihwin bad ka jingpynlong ïa ki paidbah lyngba ki social media platform kum ka WhatsApp, Facebook, Instagram bad X.
Katkum ka jingïathuh kiba haïing, ki heprit kiba khlad ki kynthup u Oinam Tomthin bad ka para jong u. Ka kmie jong ki, ka Pheiroijam Binita, kaba dei ka Nurse kaba dang shu wan phai na Guwahati ruh ka la mynsaw ha katei ka jingbthei bom bad ka dang don ha ka jingshitom kaba jur bha.
La iathuh ba u kpa jong ki u dei Indian Army.
Ki heh Sorkar ki la ong ba la pynkhlaiñ ïa ka jingpahara ha kylleng ki jaka ba jur ka jingiakhih wat haba ki jingïakynad ki dang ïai bteng, ha kaba ki nongshong shnong ki dawa ïa ka jingkitkhlieh bad ki sienjam ba kyrkieh ban pynthikna ïa ka jingshngaiñ jong ki paidbah.
