Shillong, Iaiong 02 : Ka Sorkar Jylla kala don ha ka lynti ban pyntreikam ia ka rukom siew tulop ba thymmai sha ki palat 23,000 ngut ki nonghikai SSA bad Adhoc naduh ka 1 tarik Jymmang bad ka jingpynshisha ia ki nonghikai ki ban ioh ia kane ka tulop thymmai, kala jan dep artad.
“Ngi thikna ba hapoh kine ki khyndit sngi ban wn, ngin sa lah ban pyndep ia ka bad ha ka 1 tarik Jymmang, ngin lah ban siew noh da ka tulop thymmai sha ki nonghikai” ong u Myntri ka Tnad Pule Puthi Bah Lahkmen Rymbui hadien ba dep shong jingialang bishar kam ba neh saw kynta ha ka sngi Palei.
Ka Kynhun Myntri ka Sorkar kala ai jingmynjur ban pynkiew ia ka tulop hapoh ka jingialam u Myntri Rangbah Conrad Sangma.
U Bah Rymbui ula pynpaw ba katba ka Sorkar ka nang kyntiew kyrdan ia katto katne ki skul Secondary sha ka Higher Secondary bad nang bynrap da ki stream ba thymmai, ka jingthungkam ia ki nonghikai ka dang iai long kawei ka jingeh.
“Ia mynta, ngi dang bteng ban thungkam da ka contract” ula ong haba pynpaw ba ka Sorkar ka dang pyrshang ban leh eiei halor kane ka jingeh bad thmu ban thung noh ia ki nonghikai ba pura hapoh kine ki khyndiat bnai ban wan.
U Bah Rymbui ula ong “Ngi la iakren ba kumno ban leh ha ka ban thungkam noh ia ki nonghikai ha kine ki khyndiat bnai ban wan”.
Ki kam kiba la iakren ha ka jingialang ki kynthup ia ka tulop ki nonghikai part-time, ka jingpyntrei iaki jigtei na ka bynta ki college thymmai ha Mawphlang, Patharkhmah bad Rongjeng bad ki kam jong ka University.
U Bah Rymbui u pyntip ba ki Ophisar kila pynsted ia ka jngthungkam na ka bynta ki kam kiba lait ha ki college bad ki skul, kiba long hapoh ki kyndon ka ain.
Ka jingialang ka iakren ruh ia ka jingpynbeit ryntih ia ki skul, ha kaba ki District Education Officer ki dang leh ia ki kam kiba donkam ban weng ia ki jingeh.
“Kine ki dei ki sienjam kiba donkam ban hap shim ha kaban pynbeit ryntih ia ka pule dangle hapoh ka Jylla Meghalaya” ong u Bah Rymbui.
