Shillong, Iaiong 02 : Ka Meghalaya kala kynjoh 94% ka jingdon ki nongshongshnong ba nang thok bad pule bad mynta kala buhthong ia kiba dang sah ban lah kynjoh beit 100%.
“Ngi donkam sa 38,000 ban kynjoh ia ka 95% namar shisien ba ngi la tam ia ka 95%, ka mut ba la khein kum ka Jylla ba don pura ia ki nongshongshnong bala nang ban thoh bad pule” ong u Myntri ka tnad Pule Puthi Bah Lahkmen Rymbui hadien ba pyniaid ia ka jingialang bishar kam ha ka sngi Palei.
U ong ba ka Sorkar kan sa pynsdang naduh ka 24 tarik Iaiong ban ai jinghikai ha ka pule bad khein jingkhein sha ki nong shongshnong kiba dang sah.
“Naduh 24 tarik Iaiong, ki Tnad ba buh da ka Sorkar kin sa pyrshang ban buddien ia kane khnang ba ngin lah ban kynjoh 100% ka jingdon ki nongshongshnong ba nang pule bad thoh” ong u Bah Rymbui haba pynpaw ia ka jingsngewskhem ia ka jinglah ka Jylla ban kynjoh ia kane ka thong.
