Agartala, Nailur 27: U Myntri Rangbah (CM) barim ka Tripura u Manik Sarkar ula pynrem jur halor ka jingleh bor jong ki pulit pyrshah ia ki nonghikai ka jylla kiba la shah weng kam kiba pynlong jingiakhih ha Kunjaban ha Agartala.
“Haba ki 10,323 ngut ki nonghikai ki kwah ban pynpaw ia ki jingeh ki jong ki hakhmat u CM bad ki MLA kiba don hapoh ka iingdorbar assembly ka jylla, kam long satia kaba bakla.Ha ka jaka ban khot ia ki nongmihkhmat jong kine ki nongiakhih pyrshah na ka bynta ban pynlong ka jingiakren, ki bor pulit kila pyndonkam pynban da ka bor.La pyndokam da ki tiar siat pynsat khmat, ka jingsiat da ka um bad hadien ba kane ka jingpyrshang kala pulom ki pulit kila pyndonkam da u dieng ban khanglad ia ka jingleit tur shapoh Assembly.Ia kiba kum kine ki jingjia ki dei ban pynrem jur,” ong u Sarkar uba dei ruh u nongialam liang pyrshah.
Haba ia nujor ba kane ka jingleh jong ki pulit bad ka jingjia kaba la jia ha ka 15 tarik mynta u bnai, hadien ka jingleit tur shapoh Secretariat da ki samla pule jong ka left bad ki kynhun seng jong ki samla kila ngat ha ka jingshah thombor ha ki bor pulit, ong u Sarkar, ‘Nga la ioh jingtip ruh ba kila don haduh 32 ngut ki nonghikai barim kiba la ngat ha ki jingmynsaw na ka jingshah bom shah tied ha ki pulit.”
“Ia laingut ki laingut ki briew ba la tip kyrteng kum ka Mitali Deb, Rinku Sarkar bad u Bikash Sarkar la pynkynriah noh shapoh hospital na ka bynta ban ioh jingsumar.Ia kine baroh la aijingsumar hapoh GB hospital,” ong u Sarkar da kaba pyntip ruh ia kane sha u CM ka jylla.
Katba na ka liang u CM ka jylla u Manik Saha ula jubab ia u Sarkar da kaba ong ki pulit ki leh la ka jong ka kamram. “Lada ki bor pulit ki iohi halor ka jingpynkhein ia ki kyndon ain, kumta ruh kin shim iala ka jong ka sienjam,” ong u Saha.
Katkum u Dr. Saha, la ong ba na ka liang ka sorkar ka don ia ka jingsngew synei na ka bynta kitei ki 10,323 ngut ki nonghikai kiba la shah weng kam.Ha kajuh ka por ula pynthikna ruh hapoh ka iingdorbar ba un iakynduh ia ki nongmihkhmat jong kine ki nonghikai ha kine ki sngi ki ban wan.
Na ka liang u Myntri ka tnat pule puthi, u Ratan Lal Nath ha kawei pat ka bynta ula ong ba na ka liang u District Magistrate ka West Tripura ula dep lypa ban pyntip halor ka jingpynkhreh ia kane ka jingialang.
Kham hashwa, u MLA ka seng Congress u Sudip Roy Barman ula rah ia kane ka mat kaba iadei bad kine ki 10,323 ngut ki nonghikai hapoh ka iingdorbar da kaba dawa ban tip halor kiei ki jingthmu ba la shim da ka sorkar na ka bynta ban lah ban weng noh ia kane ka jingeh junom.
Haba jubab ia kane, na ka liang u myntri ka tnat pule puthi, u Ratan Lal Nath ula ong ba na ka liang ka sorkar kala shimkhia halor kane ka bynta bad na ka liang une u CM bathymmai u don ia ka jingthmu ban weng noh shen ia kane ka jingeh jong kine ki nonghikai.
