Shillong, Nailur 27: U Myntri Rangbah ka Jylla Conrad K Sangma ula pynpaw ba um ithuh satia ia u Saket Gokhale, National Spokeperson ne nongaiktien ka All India Trinamool Congress (AITC) bad ym don jingtip ruh ia ka jingkren jong u ba kob ia ka Sorkar MDA ban iatai nia halor ka jingpyniaid bym hok ia ka synshar khadar.
“U dei uei (Gokhale)? Ngam ithuh ia u namar ki lah ban don bun ki briew na kino kino ki jaka jong ka Ri kiba lah ban mih bad ong ba ki don ia ka ishu, kane ka ishu, to ngin iatai nia” ong u Conrad haba iakren bad ki nongthoh khubor.
“Ngim (sorkar) lah ban pynlong ia ka jingiatai nia kata iaba don ki briew… Ngam ithuh ia une u briew, ngam don eiei ban ong halor kata” ula bynrap.
U Saket Gokhale ula kob ia kane hadien ba ula phah jingthoh sha u Myntri ka Tnad PWD (Building) Dasakhiat Lamare pyrshah ia ka jingkynnoh don bynta lang hapdeng ka Sorkar MDA ba ialam da ka NPP bad ki Contractor ba pyntrei ia ka Iingdorbar Thawain ba thymmai ha Mawdiangdiang.
Ula ong ba ka Meghalaya TMC kan nang sei madan ia ki jingleh bakla jong ka sorkar MDA bad ka jingiadei bym hok bad ki contractor bala shah kyntait.
“Ka TMC kan ym kynran dien tad haduh ba ki paidbah ka Jylla Meghalaya kila lait na ki tyrsim jong ka sorkar MDA” ula ong.
