Shillong, Iaiong 02 : Ki nongtih par dewiong ha Meghalaya kila pynkhreh ban pynlong ia ka rally paidbah ha ka 7 tarik Iaiong ban pynbor ia ka Sorkar Jylla bad Sorkar Pdeng ba kan thaw ia ka scientific mining policy kaba iahap kat kum ka riti bat khyndew bapher ka thain bad ka rukom long ki jaka.
“Ngi kwah ia ka Sorkar Jylla ba kan iakren bad ka Sorkar Pdeng ba kan pyntreikam ia ka scientific mining kaba iahap bad ka rukom leh ki briew jong ngi” ong u President ka Jaintia Coal Miners & Dealers Association Bah Borrin Shadap haba iakren bad ki nongthoh khubor ha ka sngi Palei.
“Ka jingwan noh ka Iingkashari Supreme Court ia ka jingkhang tih dewiong ka dei ka sienjam kaba ngi pdiang, kaba pynskhem ia ka hok jong ngi kum ki trai jaka hapoh ka Sixth Schedule” ula bynrap.
U dkhot ka seng Bah Sambormi Lyngdoh ula pynpaw halor ka jingsngewkhia ba iadei bad ka mariang bad ki jingeh kiba iatyngkhuh ha ka jingtih par da ka Open cast ha ri-lum Jaintia.
“Ka jingtih par Open-cast kam iahap satia hangne, ngi donkam ia ka policy kaba pyrkhat lang ia ka rukom long ki jaka bad ka jinglong trai jaka” ong u Bah Sambormi.
Ka rally ka thmu ban kyrpad ia ka Sorkar Jylla ba kan thung ia ka Commottee ban leh sorjamin ia ka rukom long ki jaka bad ban shna ia ka policy kaba shimkhia ia ka jingsngewkhia ki nongtih dewiong jong ki par barit baria.
“Ngi donkam ia ka policy kaba treikam na ka bynta jong ngi, ym kaba pyrshah ia ngi” ban jur u Bah Sambormi.
Kane ka seng kala khot sngewbha ia baroh ki kynhun, kynthup ki nongtih dewiong, ki nongniah trok bad ki nongbylla ba kin iasnohkti lang ha ka rally.
“Ngi kwah ban pyni ba ngi la kut jingmut shisa ban tih par da ka jingkitkhlieh, ym shuh da ka jingtih ba long beain” ong u Bah Sambormi haba bynrap “Ka por kala dei ia ka Sorkar ban pynbeit ia ki jingeh jong ngi”.
