Shillong, Iaiong 02 : Ka Meghalaya kala pynpaw ia ka jingsngewsih halor ka jingkhlad noh u Patrick Roger, u nongthoh jingthoh na America bad u nongwad bniah ba shimet uba shim ia ka bynta kaba khraw eh ha kaban buh jingthoh bad pynpaw nam ia ki “Jingkieng Jri” ka Jylla sha ka pyrthei.
U Myntri Rangbah ka Jylla Conrad K Sangma ula pynpaw ia ka jingsngewsih halor ka jingkhlad noh u Roger, haba pynpaw ba ki shnong ba don ki jingkieng jri kila duh noh ia u paralok bad iajan bad ki. Ha ka kyrwoh, u Conrad ula ong ba u Roger “um dei satia tang u nongwankai sha Meghalaya” hynrei u dei u briew uba la don ka jingiadei ba iajan bad ki khlaw lem bad ki briew hangne, uba la iarap ia ka pyrthei ban ithuh ia ka dor jong ki jingtei ba kyrpang na ka mariang hi”.
The Living Root Bridges community of Meghalaya mourn the loss of Patrick Rogers.
Patrick was not just a visitor to Meghalaya, he became deeply connected to our land, our forests, and our people. Through his dedication, writings, and years of exploration, he played an important… pic.twitter.com/dDpxp8qOHg
— Conrad K Sangma (@SangmaConrad) April 2, 2026
U Roger ula shang kylleng ka thain Shatei Lam Mihngi naduh u snem 2009, bad wan iuhkjat nyngkong eh ha ka thain kum u samla pule. Ula pynlut bun ka por jong u ha kine ki snem, kynthup ka jingiaid kjat marwei ba shi bnai lynter ha kylleng ka jylla Meghalaya ha u snem 2015, kaba lam sha ka jingpynkha ia ka Living Root Bridge Project.
Lyngba kane ka sienjam, ula jied ban buh jingthoh/ring dur ia ka jinglong ba shisha, ka jingpher bad ka jinglong shibynta jong kine ki jingkieng jri bad ka kolshor ka thain.
Ha ki jong ki jingthoh, u Roger ula pynpaw ba “Da ki phew bad phew” kum kine ki jingtei kila don ha kylleng ka Jylla Meghalaya, kiba bun na ki, ki dei ki bym pat buh jingthoh ne ring durkhih bad kiba don hapdeng ka jingma namar ka jingstad nala tynrai kala sdang ban duh. Ula maham ba satang lada pynkhlain ia ka jingpynsngewthuh, ka jingleh ia kane ka rukom ba phylla ban tei jingtei da ki jingthung ba mih hi na ka mei mariang, ka lah ban shu jah noh, kaba lah ban im tang ha ki jaka kiba la pynneh pynsah namar ki kam jngohkai.
Lyngba ka jingwad bniah ba bun snem, ula buh jingthoh ia bun tylli ki jingkieng jri, kaba long kawei na ki jingthoh shimet kiba la batai bniah bha halor kane ka sobjek. Ki kam jong ki, ki kynthup ia ka kot kum ka “The Green Unknown” bad “Through the Canyons of Living Bridges” kaba pyniasnoh ia ka jingstad tynrai bad ka jingiakren ka pyrthei shaphang ka jingpynwandur ba lah ban pynneh pynsah, ka mei mariang bad ka rukom tei jingtei.
U Roger ula iai ban jur ba ka jingsngewthuh ia ki jingkieng jri ka donkam ia ka jingiatreilang ha ki bynta bapher bapher- ban wanrah lang ia ki engineer, ki botanist, anthropologist bad kham kongsan eh, ki trai shnong kiba la ri la sumar ia ka jingleh tynrai da ki pateng la pateng.
“Ngi phah ia ka jingsngewlem naduh ka mynsiem sha ki bahaiing hasem jong u bad kiba ieid ba thoin baroh. Ai ba ka mynsiem jong u kan ioh ia ka jingjahthait shirta” ong u Conrad.
