Shillong, Iaiong 2: Ki pulit ka East Khasi Hills kin bteng ia ka jingkhynra pyrshah ia ka kam die met/ kam awria hapoh ka nongbah ryngkat ka pynleit jingmut ha kaba iadei bad ka jingai jingiarap bad ban leh eiei halor ka daw tynrai jong kane ka kam, ong u SP Bah Vivek Syiem hynne ka sngi Balang.
“Kane ka jingkhynra kan iai neh. Ka jingeh jong ki nongdie met ne leh kam awria (Sex Workers) kam dei ka jingeh ba sngewkhia tang jong ki pulit, ka dei ka jingeh ka imlang sahlang kaba ktah ruh iaka kam kamai kajih” la ong u Bah Syiem.
“Ngi donkam ban shimkhia da kaba iatreilang bad kiwei ki tnad, Social Welfare bad ka koit ka khiah ban shimkhia ia ka jingsngewkhia halor ka jingroi ka jingpang HIV bad ka jingleh ia ki kam awria ha ki jaka sah ki briew bad ki jaka mane Blei”.
U Bah Syiem ula kyntu ia ki Hotel bad Guest House ba ki dei ban kiar na kum kitei ki jait kam bad maham ban leh da kaba tyngeh.
“Ngin sa shimkhia ban iakren bad ka tnad Social Welfare na ka bynta ka jingai jingiarap ia ki nongdie met ne nongleh ia ki kam awria kiba la pdiang ban ioh ia ki jingai jinghikai pyntbit ha kiwei pat ki kam bad ryngkat bad ka tnad ka koit ka khiah ban iada ia ka jingsaphriang ka HIV” ula bynrap.
U SP ula pynpaw ruh ba ka don ka jingiadei hapdeng ka kam iaid awria bad ka jingkhaii ia ki briew.
“Ka sdang da ka kynhun kaba rit bad nangta ka sdang pat ban heh, da kaba pynngop ia ki khynnah kynthei ban ioh suk ka pisa bad buh pat ia ki ha ka jingma” ong u Bah Syiem haba banjur ba donkam ban long kiba peitngor bha.
