Shillong, Iaiong 01 : Ki Pulit Special Investigaton Team (SIT) kila ioh kem ia u briew ba la 32 snem ka rta, uba kynnoh donkti ha ka jingpyniap ia u heprit 7 snem, Kyrshanbor Kharmudai ba na Lum Myrboh, Nongrah, kaba la jia ha ka 9 tarik Risaw 2025.
Une u briew u kyrteng u Kenedy Khongsit, uba dei ruh uba sah marjan bad une u heprit. Hadien ka jingpyniap, ia ka met jong une u heprit, la leit ban bret ha khlaw Mawpat.
Haba kren sha ki lad pathai khubor ha ka sngi Balang, u Superintendent of Police Bah Vivek Syiem ula ong “Hadien hynriew bnai, ka SIT da kaba pyniasoh lang ia baroh ki sakhi satar bala ioh lum kynthup ki sakhi na ka CFSL forensic, ngi la lah ban lap ia u briew uba pyniap, uba kyrteng u Kenedy Khongshit (32), uba dei ruh u para marjan jong une u khynnah ba iap”.
“Ngi la kem ia u hynne ka janmiet bad ula kubur ba leh ia kane ka kam bymman bad yn sa ialam tian bishar ia u hakhmat ka Iingkashari ban pan por na ka bynta ban ioh pyndep ia ka jingtohkit baroh” ula bynrap.
Une uba shah kynnoh ula phla ba ula pyniap ia une u khynnah namar ka jingbitar ba une u Khynnah um ngeit ia kaei kaba u bthah.
“Ka jingpyniap ia une u Khynnah kala jia hapdeng ka por 2:30 janmiet haduh 3 baje janmiet bad kala jia ha ka iingsah jong une uba shah kynnoh, kaba don marjan bad ka Iing une u khynnah, uba leit ban peit TV ha iing jong u hadien ba dep bam ja step. Ha ka jingtohkit, une u nongshah kynnoh ula iathuh ba ula bthah ia une u Khynnah ban leit shim ia u brut bad ka borti katba u dang sait ia ka syntex hynrei une u khynnah u lapmiet ka peit TV. Namar ka jingbitar….ula ksih ia u bad thep hapoh ka syntex” ong u SP haba batai ia kaei kaba jia ha ka 8 tarik Risaw, 2025.
Ia ka metiap la leit ban bret pat hadien ha khlaw Mawpat da kaba pyndonkam ia ka scooty u bahaiing kaba dei ua Yamaha R-Z ML04-9622.
“Ula buhrieh ia ka met sha kyrpong iing. Une u nongpyniap ula thep ia ka met ha ka borni plastic bad ula kit na Lum Myrboh ha ka 4:40 baje janmiet bad wanphai tang hapoh ka shi kynta” bynrap u SP.
Ka jingtohkit, ba ialam sa ka SIT kaba khlieh da u SP (City) ka East Khasi Hills, kila mad ia shibun ki jingeh haba sdang namar ka jingbym don ki sakhi ban pyniasoh bad une u nongshah kynnoh jong kane ka kam bymmam. Ia ki sakhi la phah sha ka CFSL Guwahati bad FSL Shillong bad lah tohkit ruh ia ki katto katne ki briew.
 kila ioh kem ia u briew ba la 32 snem ka rta, uba kynnoh donkti ha ka jingpyniap ia u heprit 7 snem, Kyrshanbor Kharmudai ba na Lum Myrboh, Nongrah, kaba la jia ha ka 9 tarik Risaw 2025.){kind=link}