Shillong, Lber 31 : Ka Tnad Tourism ka Sorkar Jylla kala pynpaw ba ki khubor ba mih ha ki social media ba kam ba ka jingtyrwa ban shna ia ka Taj Umiam Resort & Spa kan buh jingma ia ka pung Umiam bad dewlynnong Lumpondeng ka dei ka bym “don nongrim” bad ba “ialam bakla”.
“Ki jingsngewkhia ba pynpaw ba kane ka project kan pynjot ia ka mariang lane kan ktah jur ia ka saw dong sawkun ka pung Umiam bad khamtam eh ka dewlynnong Lumpondeng ki dei kiba pynsngewthuh bakla bad ialam bakla” ong ka kyrwoh na u Commissioner & Secretary ka tnad Tourism ha ka sngi Ba-ar.
Ka ong ba ka project kan ieng ha ka jaka ba 66 acre – 36.10 acre ha Lumpondeng bad 29.64 acres ha ka Orchid Lake Resort ba don mynta – ba ban bud ia ka “plan kaba la bishar bniah bha kaba thmu kyrpang ban kyntiew ia ka kam jngohkai kaba heh dor, kaba duna jingktah haba pynthikna ia ka jingiada ba pura ia ka mariang”.
Ka Umiam Hotels Pvt Ltd, ka SPV bala mynjur, kala dep ioh ia ka Consent to Establish bad kala iasoi ia ka MoU bad ka IHCL ba kan pyniaid ia ka nongkynti kum ka Taj Umiam Resort & Spa.
Ka Tnad kala kdew ia ki nongrim treikam ka IHCL, kynthup ka jingiashimbynta ha ka Earth Check Certified Program naduh u snem2008 bad ka Taj Madikeri Resort & Spa, kaba la tei ha ka jaka khlaw ba 180 acre bad ka jingpyndonkam tang khyndiat eh ka jaka.
“Baroh ki jingtei bad ki jingpyniaid kam kin long thik kat kum ki kyndon ka IHCLTaj Brand, kiba bthah ban bud ryntih ia ki kyndon kat kum ki jingpynwan dur, ka jingshngain, ka jingbha bad ka jingneh”.
Ka bynta ba ka project kan iaid ruh kat kum ka Forest (Conservation) Amendment Act, 2023, Waterbodies Guidelines, 2023, bad ki kyndon ka Meghalaya State Pollution Control Board, haba buh hakhmat ia ki lad jingiada ia ka sawdong sawkun, ka jingtehlakam ia ka jingpynjakla, pynduna ia ka jingpynmh jabohbad ka jingpeitthuh ia ka jinglong jingman ka mariang.
