Shillong, Lber 31: Ka Directorate of Food, Civil Supplies & Consumer Affairs kala pyntip ba ka jingsam ia ka domestic LPG ha Meghalaya ka dang biang kumba ju long, bad la dep pynpoi haduh 22,094 tylli ki Cylinder Gas ne tyndong shet jingshet naduh ka 25-27 tarik u Lber lyngba ki 68 tylli ki trok ba la ioh pdiang da ki kynhun kiba sam gas.
Ka Tnad kala pyntip ba la sam man la ka sngi 5,558 Cylinder ha ka 25 tarik u Lber, 9662 tylli ha ka 26 tarik bad 6,874 tylli ha ka 27 tarik bad kaba bun tam ka jingsam kadei ha ka 26 tarik kaba pyni ba kala don ka rukom kaba biang bha ha ka jingsam ryntih.
La pyntip ba ka jingsam ia ka gas kala long kaba biang ha kylleng ki district da ka jingnoh synniang jong ka Sukbha Gas Agency, Meghalaya Gas Agency, Rymbai Gas Agency bad Ripnar Gas Agency.
Ka Directorate, kala pyntip ba ka jingpan pyndap biang ne Booking la pynbeit thymmai ba kan long 25 sngi na ka bynta ki bym dei ki PMUY Domestic Consumer bad 45 sngi na ka bynta ki PMUY Consumer, ha kaba ka tnad kala kyntu ia ki longiing ba kin bud ryntih ia kane ka jingbthah.
“Ym don kam ban khuslai” kala ong bad ka jingpynpoi kadei kaba la pynthikna katkum ka jingbuh por lada ia ka jingpan pyndap biang kadei kaba la bud ryntih.
Ka jingsam ia ki Commercial LPG kala long kaba iaid jai-jai, ha kaba 389 tylli ki Cylinder la dep ban sam ha ka 25–28 tarik u Lber da ka Ri-Bhoi Gas Agency bad ka Nangkiew Irat Indane.
Ka Directorate kala ong, ba kala pynlong man la ka sngi ia ka jingjurip bad kala ai ruh ia ki jingpyntip sha ka Ministry of Petroleum & Natural Gas. Ki nongpyndonkam ki lah ban phone ha u Toll-Free Number 1967 lane WhatsApp ha u 9402327737 ban ioh ia ki jingiarap.
