Shillong, March 30: Ka Sorkar Meghalaya hynne ka Sngi Nyngkong, kala sdang ia ka Project ASPIRE (Accelerating Student Potential through Interactive & Remote Education), ha ka jinglut kaba kot T.1.57 Klur kaba dei ka sienjam ba kyrshan da ka NITI Aayog, da ka jingthmu ban kyntiew ia ka jingmih bad ka jingpynkhreh ki samla ia ki eksamin ne Competitive Examination.
Ia kane ka prokram la pyntreikam da ka jingiatreilang bad ka FILO Edtech, kaba buh ia ka thong ban ai iaka jinghikai kaba paka, Career Guidance bad jinghikai pyntbit khamtam eh ha ki district kum ka Ri Bhoi. Ia kane ka project la plie da u Myntri Rangbah ka jylla u Conrad Sangma.
Ka Project ASPIRE kadei kaba la pynwandur ha ki ar bynta jong ka rukom pule lyngba ka kor Digital kaba ai ia ka jinghikai lyngba ka App bad ka jingkyrshan ha kaba iadei bad ka ‘Career’ ia ki khynnah skul bad ia kiba wadkam wadjam.
Na ka bynta ki khynnah klas IX haduh XII, kane ka rynsan ka ai ia ka jingpynkhreh ia ki Board Exams bad Competitive Tests kum ka NEET, JEE bad CLAT. Ka kynthup ia ka jingai jingkyrshan bad jinghikai kaba 24×7, kaba ailad ia ki khynnah pule ban pyniasoh bad ki nonghikai tang hapoh ka minit. Ka rukom hikai kadei ruh kaba iaid ryngkat bad ka Meghalaya Board of School Education bad kadei kaba kyrshan da ki Live Classes, ka jingrekod ia ki lynnong bad ka Question Bank ne ka thup jingkylli kaba don haduh 1 lak tylli ki jingkylli.
Yn pynlong ia ka jingkhmih bniah kaba man la ka bnai ha ki skul bad yn khmih ruh ia ka jinglong jingman ha ki kyrdan jong ki District ban ithuh ia ki khynnah kiba donkam shuh shuh ia ka jingkyrshan. Kane ka rynsan ka kynthup ruh ia ka jingiasyllok kaba man la ka por.
Na ka bynta ki khynnah kiba la pyndep ia ka klas XII, ka wat ka baar ka pynleit jingmut ban pynkhreh ia ki eksamin ban iakhun ia ki kam sorkar, kaba kynthup ia ka Banking, Railways bad SSC. Ka ai ia ka Live bad Recorded Classes, ryngkat bad ka jingphah ia ki jingpynsngew lyngba ka AI bad ki thup jongka jingleh ia ki Test. Ki ophisar kila pynpaw ba ia kine ki jingpynrung la khmih lynti ba kan pynlong ia ka jingai jinghikai kaba biang bad kaba la nang bha shuh shuh.
Kane ka sienjam kala wan ha ka por ba bun ki don ia ka jingsngewkhia halor ka jingdon duna ia ki nonghikai kiba la tbit bha ha ka kyrdan Secondary, ban ioh ia ka lad ban ioh ia ki jinghikai pyntbit bad ka jingduna ha kaban pynsngewthuh ia ki lad ban btin ban kynjoh ia ka thong kaba ki don khamtam eh ha ki thain nongkyndong bad ki jaka kiba don ha khapsor.
Ki ophisar kila pynpaw ba kane ka prokram kadei kaba la khmih lynti ba kan iarap ha kaban ithuh mardor ia ki jingduna bad ban ai ka jingkyrshan ha ryngkat bad ka pyniar ia ka lad ban pynkhreh bad ban iakhun ia ki Competitive Exam ha kylleng jong ka jylla.
, ha ka jinglut kaba kot T.1.57 Klur kaba dei ka sienjam ba kyrshan da ka NITI Aayog, da ka jingthmu ban kyntiew ia ka jingmih bad ka jingpynkhreh ki samla ia ki eksamin ne Competitive Examination.){kind=link}