Shillong, Lber 29 : Ka Meghalaya kan ioh T.2,070 klur hapoh ka skhim ba wanrah thymmai ka Sorkar Pdeng ba ai kyrteng “Pride of Hills”-na ka bynta u snem 2026-27, da ka jingthmu ban pynsted ia ki kam pynroi ha ki Jylla lum kiba mad ia ki jingeh na ka rukom long ki jaka.
U Myntri Rangbah ka Jylla Conrad K Sangma ula pynpaw ia ka jingsngewnguh ia u Myntri Rangbah Duh ka Ri Narendra Modi bad ka Myntri Pla tyngka Nirmala Sitharaman halor ka jingpynlait ia kane ka skhim hapoh ka Special Assistance to States for Capital Investment (SASCI).
Very grateful to the Hon’ble PM and Hon’ble Union Finance Minister, Smti @nsitharaman ji for creating a new component under SASCI for 2026-27 called ‘Pride of Hills’ through which additional funds are provided to Hilly States. This is a special recognition of our unique… pic.twitter.com/brb7RYEo2T
— Conrad K Sangma (@SangmaConrad) March 29, 2026
Haba thoh ha Social Media, u Conrad ula ong ba ka jingpynmih ia ka song “Pride of Hills” ka dei ka “jingithuh ba kyrpang ia ki jingeh kiba phylla” bala mad da ki Jylla lum kum ka Meghalaya, haba pyntip ia ki kam pynroi kiban wanrah jingkylla, kiba dang iaid mynta ha ka thain.
Ka skhim kaba la mang baroh lang haduh T.25,000 klur, ka dei kaba thmu na ka bynta ki Jylla kiba don ia ki jaka kiba eh, ka jingduna ki paid nongshongshnong bad jingduna ka jingpynmih pisa-ki daw kiba ju lam sha ka jingtlot ka pla tyngka bad ka jingjur ka jingshah na ki jingphah pisa ka Sorkar Pdeng.
Kat kum ki kot ki sla, ka song pisa ka dei kaba thmu ban pynkhlain ia ka jingpynlut pisa ha ki jingtei bad kyrshan ia ki Jylla ha kaban lah siew ia ki jingsiew ba hap ban leh kum ka tulop, ka bai bam tynmen, ka jingsiew sut, haba pynkhlain ruh ia ki project jingtei bad kam pynroi.
Napdeng ki nongioh jingmyntoi, ka Arunachal Pradesh kala ioh heh duh ia ka song kaba kot haduh T. 4,900 klur, bud sa ka Himachal Pradesh-T.3,920 klur, Nagaland- T. 3,880 klur, Meghalaya T.2,070 klur.
Ki Heh Sorkar ki ong ba ka jingnang ai shuh shuh ia ka bhah-nalor ka kyndon ka SASCI, ka lah ban nang pynkhlain ia ka jingpyntoi ia ki jingtei bad ka jingkiew ka ioh ka kot ha ki Jylla lum kynthup ka Meghalaya.
