Shillong, Lber 28 : Ki Pulit ka East Jaintia Hills ha ka sngi Thohdieng, kila hiar khynra ia kawei ka par ba tih dewiong beain ha ka shnong Wailong, kaba hap hapoh ka shnong Sutnga bad ioh kem ia 9 ngut ki nongbylla tih dewiong.
Kat kum ka jingpyntip u Superintendent of Police, ia kane ka jingkhynra la pynlong halor ka jingioh jingtip ba thikna ia ka jingdon kane ka par ba tih dewiong beain ha ka thain.
Une u Heh Pulit u pyntp ba ia ka ejahar halor kane ka kam beain la register ha Khliehriat Police Station bad ka jingtohkit kaba bniah kala iaid mynta ban lapdien ia ki jaka shalan ia u dewiong bad ki briew kiba donkti ha kane ka kam.
Kane ka jingkhynra ka dei ka jingpyrshang kaba iai bteng jong ki Pulit ka East Jaintia Hills ban tehlakam ia ka kam tih dewiong beain ha ka district.
U SP ula pynskhem biang ia ka jingkut jingmut ban nym aili satia ia ka kam tih dewiong beain bad ba ka Tnad kan leh da kaba tyngeh ia ki briew kiba donkti ha kane ka kam beain.
Dang shen palat 30 ngut ki nongbylla dewiong kila iap ha ka jingpynbthei bomb ha kawei ka par ha Mynsngat-Thangsko myn ha ka 5 tarik Rymphang 2026.
Ka Sorkar Jylla kala thung ia ka Judicial Inquiry Commission ba tohkit ia kane ka jingjia bad la aipor hynriew bnai ia ka Commisson ba kan aiti ia ka kaiphod. Kat kum ka kyndon tohkit, ka Commission kan tohkit ym tang ia ka jingjia kaba jia ha ka 5 tarik Rymphang, 2026 hynrei kan tohkit ruh ia ki daw tynrai jong ka jingtih dewiong beain bad ba kan ai ia ki jingai jingmut, ia kaba, kat kum ka Commission of Inquiry Act, 1952 yn sa wanrah hapoh ka Iingdorbar.
Ka Director General of Police (DGP) Kong Idashisha Nongrang kala thung ruh ia ka Special Investigation Team (SIT) ban tohkit ia ka daw tynrai halor ka jingbthei ka par tih dewiong bad ia ka SIT yn khlieh da u Dy Inspector General of Police (ER) Vivekanand S Rathore.
