Shillong, Nailur 26 : U Myntri Rangbah ka jylla ha ka janmiet sngi Nyngkong u la plie pyrda ia ka lympung 2nd Northeast Olympic Games 2022 kaba yn pynlong ha kane ka jylla naduh ka 10 tarik u Risaw haduh ka 16tarik utei u juh u bnai.
Ia katei ka lympung la plie ha ryngkat ka jingdonlang u Chief Secretary ka Jylla Bah DP Wahlang nalor kiwei kiwei ki heh sorkar kynthup naduh ki nongialam ka Meghalaya State Olympic Association.
Ha kane ka lympung ki don haduh kumba 3000 ngut ki nongialehkai kiban wan na kyllleng ki jylla jong ka thain shatei lam mihngi jong ka Ri.
Haba kren kum u Kongsan ha katei ka jingialang u Myntri Rangbah u la ong ba ka sorkar ka la pyrshang borbah ban kyntiew ia ki kam ialehkai wat hapdeng ki Arsnem ba ki mad ia ka khlam COVID.
“Ka long kaba donkam iangi ban kham pynleit jingmut ha ki jingialehkai kiba ngi kham paw kumba leh ka Manipur. Peit kum Haryana ruh ki jied ia ki jait j3ingialehkai kiba ki nongshong shnong ki tbit,” u la ong.
Nalorkata u ong ruh ba kam lah satia ban long ba tang kaba ai ia ki song pisa ia ki synjuk ialehkai bapher bapher kin lah noh mynta mynta hi ban wanrah khusnam na ki lympung heh.
U ong ruh ba ka jylla ha ki saw snem tam ka la ioh ban kynduh kumba palat 5000 ngut ki samla ialehkai ban jied ia kiba don ka sap kaba kham kyrpang.
“Bun kiba leit ban aireng shabar ki lut nalade hynrei mynta ka sorkar ka sdang ban ai ki jingiarap pisa watla ka long tang khyndiat hynrei kadei ka dak jong ka jingithuh ia kito ba khur takma ha ki lympung meghalaya Games lane wat ha ki jingiakhun ha ka Ri,” u la bynrap shuh shuh.
Shwa kane u Myntri Rangbah u ong ruh ba hadien ba ki ioh ban pynlong biang ha ka jylla ia ka Meghalaya Games hadien u COVID bun ki jylla ki sdang ban pyrthuh lang ban pynlong ia kum kine ki lympung ialehkai ha ki jylla jong ki.
U la pyntip ruh ba shen kin sa don ki synjuk ba paw ban seng ia ki jaka hikai phutbol kiba paka (centre of excellence) ha kane ka jylla.
“Ka long kaba donkam iangi ban kham pynleit jingmut ha ki jingialehkai kiba ngi kham paw kumba leh ka Manipur. Peit kum Haryana ruh ki jied ia ki jait jingialehkai kiba ki nongshong shnong ki tbit.”
Ha kane ka sngi la sam ruh ia ki jingkyrshan pisa sha ki synjuk ialehkai bapher bapher kynthup ka jingai jingkitbok ia ki samla ban leit aireng ha ka National Games kaban long shen.
