Shillong, Lber 20 : U Symbud Myntri Rangbah ba khmih ia ka kam Pohiing Bah Prestone Tynsong ula iathuh ba ka Sorkar kan ym pynlait satia ia ki Nongialam Sengbhalang ba kem ha ka jingkulmar ha ri-lum Garo, haba pynpaw ba ka rai ban pynjlan ia ka elekshon GHADC ka dei kaba la shim khnang ban ailad ia ka Council ba kan pyndep iala ka kam kat kum ka riti synshar.
“Lada phi ong pynlait noh ia ki, yn leh kumno lada ki don ki kam beain kiba ki iadonkti” ong u Bah Prestone haba iakren bad ki nongthoh khubor ha ka sngi Thohdieng haba jubab ia ka jingdawa jong ki Sengbhalang.
“Ki don ki ain kiba hap pyntreikam bad ngi don hangne ban pyntreikam ia ki ain…Ngin lah ban long jemnud palat…..ai ba ka ain kan iaid hala ka jong ka lynti. Phim lah ban ong ba phi lah ban leh kat kaba phi kwah” ula ong haba pynpaw ba ki jingbyrnem ban pynheh ia ka jingiakhih lada ym pynlait ia ki nongialam ki dei ki bym shongain satia.
“Haba ngi file ia ka chargesheet, ka mut ka don ka ain bad ngi hap ban bud ia ki rukom treikam. Lada ki leit sha Iingkashari, ki lah ban ioh jamin” ong u Bah Prestone haba bynrap ba wat hadien ba pynjlan ia ka elekshon halor ki jingdawa ki trai shnong “ki dang don ki jingpyrshang ban pynthut ia ka shongsuk shongsain” ia kaba ka Sorkar kan nym ailad satia hangno hangno ruh ha Meghalaya.
Haba kyntu ban wanrah noh ia ka jinglong jingman ba jai jai ha ri-lum Garo, ula ong ba ka jingpynslem ban pynlong ia ka elekshon ka ai ka lad ia ka GHADC ba kan pyndep ia ka kamram kat kum ka riti synshar.
“Nga kyntu ia ki paidbah khamtam ha ri-lum Garo ba kin long jai jai noh bad kat kum ka jingdawa jong ngi, ngi la pynjlan ia ka elekshon GHADC bad ngi la ailad ia ka Council ba kan leh ia ka kam kaba donkam ia ka ban leh” ong u Bah Prestone.
