Shillong, Lber 18: Ka Confederation of Meghalaya Social Organisations (CoMSO) kala kyntu ia ka sorkar jylla ba kan pynsangeh noh ia ka jingkem briew bad ban pyllait noh ia ki nongialam sengbhalang kiba la shah kem dang shen ha West Garo Hills haba maham ba ka jingset phatok ka lah ban nang pynjur ia ka jingkulmar ha ka thain.
Ha ka kyrwoh ha ka sngi Balang, u Vice‑Chairman ka CoMSO Bah Sambormi Lyngdoh ula ong, ba ka Confederation ka pynpaw ia ka jingsngewkhia kaba jur halor ka jinglong jingman ha ri-lum Garo, kaba dang ima bad long synjor ka suk ka sain.
“Ha ka por ba dei ban buh hakhmat eh ia ka jingjaijai, ka jingleh kaba dang shen da ka sorkar jylla khamtam ha kaban kem ia ki nongialam sengbhalang, kala synniang ia ka jingbyn thikna aiu ban jia bad ka jingklumar” ula ong haba bynrap “Ka CoMSO ka don iaka jingngeit kaba skhem ba ki seng ne ki kynhun ha ka imlang sahlang ki don ia ka bynta kaba khraw ha kaban pynsngew ia ka sur bad ia ka jingsngewkhia jong ki paitbah. Ka jingkem ia ki nongialam sengbhalang ha ka jaka ban wanrah ia ka jingsuk, ka buh jingma pynban ban nang ai ding ia ka huri hura bad ban thaw ia ka jinglong jingman ka bym don jingshaniah hapdeng ka sorkar bad ki paitbah. Kum kitei ki sienjam ki phah ia ka kyrwoh kaba bakla bad ki lah ban iuhroit ruh ia ki jingpyrshang ban pynneh ia ka shongsuk shongsain ha ka thain”.
“Ngi kyntu jur ia ka Sorkar Jylla ba kan shim mardor ia ka lynti kaba bha bad ka rukom kaba don ia ka jingkitkhlieh da kaba pynsangeh noh ia ka jingkem bad ban buh hakhmat ia ka jingiakren bad jingiasyllok bad baroh kiba donbynta lang. Yn ym lah ban pynjari ia ka jingsuk da ka bor, yn hap ban tei lyngba ka jingiasngewthuh jingmut, jingburom bad jingiatreilang” la bynrap u Bah Lyngdoh.
Ka CoMSO kala kyntu ia ka sorkar ban shim mardor ia ki sienjam ban pynjaijai ia ka jinglong jingman, ban pynthikna ba dei ban pyllait noh ia kito kiba la shah kem na ka bynta ka bha ka miat bad ban ioh ia ka jingshaniah na ki paitbah bad ban iatreilang bad ki nongialam ka imlang sahlang ban pynneh ia ka shongsuk shongsain ha Garo Hills.
Ka synjuk kala pynpaw ruh ba ka iengskhem ha ka jingkular ban ieng ryngkat bad ki paitbah bad ban kyrshan ia baroh ki jingpyrshang kiba thmu ban ai ia ka jingbishar kaba hok, ban pynneh pynsah ia ka jinglong jingman bad ban ioh ia ka jingsuk kaba neh ha ka thain.
 kala kyntu ia ka sorkar jylla ba kan pynsangeh noh ia ka jingkem briew bad ban pyllait noh ia ki nongialam sengbhalang kiba la shah kem dang shen ha West Garo Hills haba maham ba ka jingset phatok ka lah ban nang pynjur ia ka jingkulmar ha ka thain.){kind=link}