Guwahati, Lber 15: Ka Election Commission ka India kala pynbna baka jylla Assam kan leit sha ka jingia thep vote ha ka 9 tarik Iaiong na ka bynta ka elekshon sha ka iingdorbar thawain ka jylla kaban long tang ha ka wat ba nyngkong, haba pynbna ruh ia ka elekshon sha ka iingdorbar thawain ka jylla ha ki san tylli ki thain.
Ryngkat bad ka Assam, ki nongthep vote ka jylla Kerala bad ka Union Territory jong ka Puducherry ruh kin ioh thep vote ha ka 9 tarik Iaiong, katba ka Tamil Nadu kan thep vote ha ka 23 tarik Iaiong, bad ka West Bengal kan pynlong ia ka jingthep vote ha ki ar bynta ha ka 23 tarik bad 29 tarik Iaiong.
Haba pynbna ïa kane ka por ha ka jingïalang bad ki lad pathai khubor ha New Delhi, u Chief Election Commissioner (CEO) u Gyanesh Kumar u la ong ba ka Commission ka kan pynthikna ïa ka jingïaid beit ka jingpynkhreh kaba kynthup ïa baroh kaba shongsuk shongsaiñ.
“Ka jingthmu jong ngi ka long ban pynlong ïa ka elekshon kaba sted, kaba kynthup ïa baroh bad kaba iaid beit khlem kano kano ka jingthut.Da kaba buh por ïa ka jingthep vote ha ka 9 tarik Lber, ngi pynthikna ba ka jingïaid lynti baroh kawei kan long kaba la dep bha shwa ban sdang ka jingrakhe Rongali Bihu,” ong u Kumar.
Kane ka rai ka pyni ia ka jingleit noh na ka elekshon sha ka iing dorbar thawain jong ka Assam ha u snem 2021, kaba la pynlong ha ki lai bynta.Katkum ka jingong jong ka Commission, ka jingpynbha ia ka rukom jied nongmih khmat bad ka jingpynkhreh ia ka jingpahara ka la pynlong ia ka jingthep vote ha ka shi sngi.
Ki heh ophisar sorkar ki la ong ba ka “jingpynkhuid” ïa ki thup nongthep vote bad ka jingpyndonkam lypa ïa ki Central Armed Police Forces (CAPF)—ba la peit bniah da ka ECI-ka la ïarap ban thung ia ki nongpeit pyrman ha ka rukom trei kam.
Haba pynpaw ïa ka jingdonkam ki thup nongthep vote kiba dei hok, u Kumar u la ong “ki thup nongthep vote kiba khuid ki dei ka nongrim jong kano kano ka synshar paidbah.” U la bynrap ruh ba ka Special Intensive Revision (SIR) ïa ki thup kyrteng jong ki nongthep vote la pynlong katkum ka Article 326 jong ka Riti Synshar ka ri India ban pyntikna ba uwei pa uwei u nongthep vote uba dei hok un kynthup lang katba ym don u bym dei hok ban sah ha ka thup kyrteng.
U Chief Commissioner u la ai khublei ruh ïa ki ophisar ki Booth Level, ki Electoral Registration Officers, District Election Officers bad kiwei kiwei ki ophisar ha kaba iadei bad ka election kiba la pyndep ïa kaei kaba u la batai kum ka “jingtreikam kaba heh bha ha ka synshar paidbah.”
Haba kynthoh ia kane ka jingpynbna, u myntri sorkar ka jylla Assam u Atul Bora u la ong ba ka kynhun synrop kaba synshar ka la pynkhreh pura na ka bynta kane ka elekshon ban wan.
“Ngi la pynkhreh janai pura na ka bynta ka elekshon.Mynta ka sngi, baroh ngi la ia kynduh ia u Amit Shah bad ngi la ioh ban iakren ba bniah bha, u Myntri Rangbah ka Jylla jong ngi bad u state president ki la iadon lang.Ka jingialang jong ka parliamentary board kan long ha ka 17 tarik”, la ong u Bora.
Haba pynpaw ïa ka jingshaniah bad ka jingkyrmen jong ka kynhun synrop kaba synshar, u la bynrap, “Ha kane ka kynti, ka NDA kan sa ïoh ïa ka hat-trick.”
Ka elekshon kan rai ïa ka jinglong jong ka Ïingdorbar Thaw Aiñ jong ka Assam kaba don 126 ngut ki dkhot, kaba buh ïa ka lynti na ka bynta kawei na ki jingïakhun saiñ hima sima ba la peit bniah bha ha ka jylla shwa ka jingrakhe Rongali Bihu.
