Guwahati, Lber 13: U Myntri Rangbahduh ka ri Narendra Modi ha ka sngi Thohdieng u la plie bad buh ïa u maw nongrim na ka bynta ki projek kam pynroi kiba shongdor palat ₹4,570 klur ha Kokrajhar, haba ban jur ba kine ki project kin pynsted ïa ki jingtei, ka lad pyniasoh, bad ka jingkiew ka ioh ka kot ha ka thaiñ Bodoland.
Haba kren ha kane ka jingïalang lyngba ka video conferencing namar ka jinglong ka suiñbneng kaba sniew, u Modi u la ong ba ka Bodoland ka la rung sha ka bynta kaba thymmai jong ka jingsuk bad ka roi ka par, da kaba pynïapher ïa ka bad ki phew snem ba mynshuwa kiba la paw da ka jingbym don ka jingsuk. U la ong ba ka thain bad ka Assam mynta ki dang “thoh ia ka lynnong kaba thymmai jong ka jingsuk bad ka jingroi jingpar.”
Ki projek ki kynthup ïa ki jingtrei pynheh surok hapoh ka bynta ba lai jong ka prokram Asom Mala, ha kaba palat ₹1,100 klur la buh kyrpang na ka bynta ban shna ia ki surok ha ka thaiñ Bodoland Territorial Region (BTR). U Myntri Rangbahduh u la ong ba ka jingpynbha ia ka jingpyniasoh kan kyntiew ia ka khaii pateng, ka kam jngohkai pyrthei, bad ka jinglah ban ioh ia ki iew ki hat na ka bynta ki nongrep.
U Modi u la pynpaw ruh ïa ki jingpyrshang kiba dang ïaid shakhmat ban pynbha ïa ka jingïadei bad ka lynti rel ha ka thaiñ, ka jingpynthymmai ïa ki steshon, bad ka jingpynbha ïa ki jingtei kiba lah ban pynïasoh bad ka Bhutan, da kaba buh ïa ka Kokrajhar kum ka jaka pynpoi marbam. U la kdew ba ki rel ba rem dor kum ka Vande Bharat bad ka Rajdhani Express kiba sangeh ha Kokrajhar, ki pyni ïa ka jingkiew kane ka thaiñ.
Haba pynkynmaw ïa ka jingwan jngoh jong u ia ka Assam kham mynshwa, u Modi u la ïaroh ïa ka kolshor jong ka jaidbynriew Bodo, kynthup ïa ki jinglehniam kum ka jingngeit Bathou bad ka tamasa Baisagu, da kaba ong ba ki pynskhem ïa ka jinglong kyrpang jong ka ri India. U la ai burom ruh ia ki nongialam ba paw jong ka Bodo, u Upendranath Brahma bad u Roopnath Brahma.
U Myntri Rangbahduh u la ong ba ka jingïateh kular iasuk ne ka Bodo Peace Accord jong u snem 2020 ka la don ka bynta kaba kongsan ban wanrah ia ka jingsuk ha ka thaiñ. U la bynrap ba ki jingkular hapoh ka jingiateh — kynthup ia ka jingpynroi kaba ₹1,500 klur bad ka jingithuh ia ka ktien Bodo kum ka Associate Official Language ka sorkar ha Assam — ki dang pyntreikam.
U Modi u la ïaroh ruh ïa ka jingpyrshang jong u Myntri Rangbah ka Assam Himanta Biswa Sarma bad ki nongïalam ka Bodoland kiba iai tynruh na ka bynta ki kam pynroi ha kane ka thaiñ.
