Shillong, Lber 13 : Ka Meghalaya Bharatiya Janata Party (BJP) kala pyntip ba u Lat ula kular ba un sa pan jingmut na ki riewshemphang (expert) halor ka jingdawa ka party ban shah tang ia ki riewlum ba kin thep vote ha ka elekshon Garo Hills Autonomous District Council (GHADC).
Ia kane la pyntip da u Nongaiktien ka BJP Bah M H Kharkrang ha ka kyrwoh kaba la pynlait hadien ba ki Nongialam ka party kila iakynduh ia u Lat ka Jylla ha ka sngi Thohdieng.
Ka BJP hapoh ka jingialam u President Rikman G Momin bad u MLA ka Pynthorumkhrah Bah AL Hek, kila kyrpad ia u Lat ba un tuklar lem ha ka ban pyn pyrrkhing shuh shuh ia ka Assam & Meghalaya Autonomous District (Constitution of District Councils) Rules, 1951 khnang ba tang ki Scheduled Tribe trai ri kin lah ban iakhun lane thep vote ha ka elekshon sha ka Iingdorbar GHADC.
Kane ka kynhun ka BJP kala aiti ruh ia ka dorkhas ba dawa ban pynlong kyrkieh ia ka Dorbar jong ka GHADC bad ban wanrah ia ka amendment ka ban shah tang ia ki riewlum trai ri ba kin iakhun ne thep vote ha ka elekshon.
“Ki rule ki dei ban shai bha….kaba lait na kino kino ki jingbakla ki ban pynmyntoi ia ki riewlum trai ri ka Meghalaya” ong ka party.
U Bah Kharkrang ula ong “Kawei ba ki jingpynkylla bala ai jingmut ka ongba u briew u dei ban don ia ka syrnot Scheduled Tribe bad u dei ban dei napdeng ki lai Jaidbynriew riewlum ka Meghalaya ban lah iakhun elekshon lane ban thep vote”.
“Ka kynhun kala kyrpad ruh ia u Lat ba un khot ia ka Dorbar ba kyrkieh jong ka GHADC ban pynthikna noh mardor ia ka jingmynjur ia ka amendment” ula ong.
U Bah Kharkrang ula pyntip ba u Lat ula kular ia ki nongialam ka Party ba haba khmih ia ki jinglong jingman, un sa phah mardor ia ka jingai jingmut sha ka kynhun ki riewshemphang ban pynthikna ba kin bishar kat kum ki ain.
“Shisien ba ki riewshemphang kila ai ia ki jingmut bad jingmynjur jong ki, u Lat yn sa sdang ban leh ia ki kam kiba donkam ban leh ki ban long kat kum ki kyndon bad ka lynti iaid bala buh da ka Riti Synshar ka Ri” ula bynrap.
 kala pyntip ba u Lat ula kular ba un sa pan jingmut na ki riewshemphang (expert) halor ka jingdawa ka party ban shah tang ia ki riewlum ba kin thep vote ha ka elekshon Garo Hills Autonomous District Council (GHADC).){kind=link}