Iasyllok u CM ka Sikkim ia ka jingdonkam ka lynti rel bad ki nongthoh khubor ka Jylla

Shillong, Lber 12: U Myntri Rangbah ka jylla Sikkim u Prem Singh Tamang (Golay), ula iakren bad ka kynhun ki nongthoh khubor kiba na ka jylla Meghalaya ha ka miet jong ka sngi balang, ha ka iingkhot bam ja sngewbha sha iingsah kaba don ha Gangtok.

Ha kane ka jingiakynduh bad ki nongthoh khubor, u Golay ula kren shaphang ki kam pynroi kiba hakhmat eh kaba ka sorkar kala leh ha ka jylla Sikkim, ki sienjam bad ki jingpyrshang kiba la shim da ka sorkar ban kyntiew ia ka jingiai neh jong ka kam pynroi, ban pynneh pynsah ia ka mei mariang bad ia ka bha ka miat jongka imlang sahlang.

Ula shah shkor bha ruh ia ki jingpynpaw na ka kynhun ki nongthoh khubor ka Meghalaya ha kaba iadei bad ki kam pynroi ha Meghalaya, kynthup ia ka jinglong jingman bad ia ki lad jingiarap ia ki nongthoh bad nongpathai khubor ka Meghalaya bad halor ka jinglong jingman ka imlang sahlang bad ka jingkiew jong ka kam jngohkai.

U Golay ula pynpaw ia ki mat kiba kongsan bha kiba la shimkhia da ka sorkar Sikkim kaba kynthup ia ka Mero Rukh Mero Santati, da ka jingthmu ban pynkhlain ia ka jingiadei hapdeng ki kmie ki kpa bad la ki khun bad ka mariang. Hapoh jong kane ka prokram, la thung 108 tylli ki dieng tynrai haba kha ia iwei pa iwei i khunlung hapoh ka jylla. Kane ka jingleh kadei ban pyniasoh ia ka jingkha ia i khunlung bad ban pynneh pynsah ia ka mariang bad ka pynshlur ruh ia ki longiing ba kin sumar bad iada ia ki dieng katba i khunlung ila sdang ban san.

Ula kren ruh ia ka jingdonkam ban pynshlur ban kha khun hapoh jong ka jylla hi bad ka pynpaw ba ka Total Fertility Rate (TFR) ha Sikkim la sakhi ba kala nang hiar bha. Halor kane, ka sorkar kala wanrah ia ki jingai jingiarap bad ki jingkyrshan bapher bapher da ka jingthmu ban pynshlur ia ki longiing longsem bad ban pynthikna ia ka bha ka miat jong ki kmie bad ki khun.

U Golay ula pynpaw ruh ba ka sorkar Sikkim ka iengskhem ha ka nongrim bad ka polisi treikam ban iakhun tyngeh ia ka jingpyndonkam ia u droks bad la shim ruh ia ki sienjam kiba tyngeh ban tehlakam ia ka jingkhaii droks be-ain khamtam eh hapdeng jong ki samla.

Ula banjur ba ki jylla jong ka thain shatei lammihngi kidei ban iatreilang ban rat dyngkhong ia u droks na kane ka thain.

U Golay ula kren ruh ha kaba iadei bad ka jingkiew ka jingwan tuid ki nongjngohkai sha ka jylla Sikkim bad ka pynpaw ba ka kam jngohkai ka long u paia uba kongsan tam ha ka ioh ka kot jong ka jylla bad ula ong, ba ka sorkar ka iai trei shitom ban pynthikna ba ki nongwankai kin ioh ia ka jingshngain, ka jingaram bad kaban sah jingkynmaw haba ki leit shang ha kylleng ki jaka kiba itynnad bad ban sakhi ia ka kolshor bad ka riti dustur tynrai kaba naduh hyndai hynthai jong ka jylla.

U Myntri Rangbah ula kren ruh shaphang ka jingiaid shakhmat jong ka jingshna ia ka projek rel ne ka Sivok–Rangpo Railway Project, kaban pyniasoh ia ka Sikkim bad ki lynti rel jongka ri ha ka sien kaba nyngkong eh. Ula pynpaw ia ka jingkyrmen ba ia kane ka projek yn pyndep noh hapoh u snem 2027 bad kan pynsuk shibun ia ka leit ka wan ban poi sha ka jylla Sikkim.

Ula pyntip ruh shaphang ki lad ai jingiarap ia ki nongthoh bad nongpathai khubor ka jylla Sikkim kaba kynthup ia ka Pension Scheme, ki lad ai jingiarap bad jingkyrshan bad ula kylli ruh shaphang ki lad jingiarap kaba ki nongthoh khubor ka Meghalaya ki ioh na la ka sorkar jylla.

Ula banjur ia ka jingkongsan jong ka kamram ki nongthoh bad nongpathai khubor ha kaban pynkhlain ia ka riti synshar paitbah bad ban pyniajan ia ka jingiadei hapdeng ka sorkar bad ki paitbah.

Ka kynhun ki nongthoh bad nongpathai khubor kiba la leit jngoh ia ka jylla Sikkim, kila iaroh ia ka roi ka par, ka rukom synshar khaddar jong ka Sikkim khamtam ia ka jingbanjur ia ka rep ka riang kaba khlem ai dawai ne ‘Organic Farming’, ka rukom pyniaid ia ki kali, ka jingkhuid jingsuba, jingshongsuk shongsain bad kila iaroh ruh ia ka jingsbun mynsiem bad ka jinglong kaba pdiang sngewbha da ki nongshong shnong ka jylla Sikkim.

Kane ka kynhun kynthup ïa ki nongthoh bad ki nongpathai khubor na Meghalaya bad kila leit ban jurip ia bun tylli ki jaka kiba kongsan kiba don ha kylleng ki bynta jong ka Sikkim, ia kaba la ialam ia ki, da ka Press Information Bureau Shillong ryngkat bad ka Press Information Bureau Gangtok.

Ia kane ka kynhun la ialam da u Gopajit Das uba dei u Assistant Director ka Press Information Bureau Shillong ryngkat bad u Manas Pratim Sarma u Assistant Director ka Press Information Bureau Gangtok.