Dawa ka BJP ban khang ia ki ‘poi ei’ ha ka elekshon GHADC

Shillong, Lber 12 : Ka Bharatiya Janata Party (BJP) kala pynpaw ba ka ieng skhem bad ki jaidbynriew riewlum bad dawa ba ym dei ban ailad ia ki riew poi ei ba kin iakhun ia ka elekshon ka Garo Hills Autonomous District Council (GHADC).

Ha ka kyrwoh, u President ka BJP Rikman G Momin ula pynpaw ia ka jingsngewkhia kaba jur halor ki jingkulmar ha Chibinang, Tura bad ha kiwei kiwei ki jaka ha ka 9-10 tarik Lber bad kyntu ban wanrah pat ia ka jingsuk bad jinglong ba jai jai ha ka thain.

Ula ong ba ka BJP ka kwah ban pynpaw da kaba shai ia ka nongrim jong k aka “Ym dei ban ailad ia ki riew poi ei ba kin iakhun ia ka elekshon jong ka GHADC”.

“Ka GHADC ka dei ka bor synshar bala pynkha hapoh ka Sixth Schedule jong ka Riti Synshar ba kan iada ia ka hok bad jingsynshar hi dalade jong ki jaidbynriew riewlum trai ri. Dei ban pynneh ia ka jingiada” ong u Momin haba bynrap “La ka dei ka Tribal Autonomous District Council Election, ka Legislative Assembly Elekshon, lane ka Parliamentary Election, ym dei ban shah ia ki riew poi ei ba kin bsuh khlieh ha kine ki kam jied nongmihkhmat, ha kano kano ka jaka ha India”.

Ka BJP ka maham ia ka jinglong jingman kaba ima ha ki jaka ki paid riewlum bad ong ba kam dei tang ka jingwan buhai shnong hynrei ka jingpynkylla kaba ryntih ia ka jinglong kyrpang, ka hok ki riewlum bad ka kam jied nongmihkhmat.

“ki riew poi ei kila iashong kurim ia ki Jaidbynriew trai shnong bad lyngba kine ki jingiashongkurim, ki ioh ia ki jait nalor bad ki kot ki sla kum ki Aadhaar Card, Voter ID, Ration Card bad pyrshah ban pyni ialade kum ki nongshongshnong ba pura. Kane ka pynlah ia ki ban thied jaka bad nongkynti ha kito ki thain” ula ong haba dawa ba dei ban shna ia ka ain kaba pyrrkhing bha kham kloi kat kaba lah ki ba long pyrshah ia kine ki jingleh.

Une u Nongialam ka BJP ula kular ba ka Sorkar Pdeng ka long kaba kloi bad kwah eh ban iarap ia ka Sorkar Jylla ha kaban wanrah pat ia ka jingsuk ha ka thain ri-lum Garo baroh kawei.