Shillong Nailur 25: U Myntri ka pule puthi ma Lahkmen Rymbui u la pynshai ba ka jingai show cause notice ne ka jingpan jingpynshai ia ki nonghikai ka skul Pine Mount namar ba kum ki nongtrei sorkar kim shym la iaid katkum ki kyndon jong ka Service Rules.
Ka Tnad pule puthi ka Jylla kala phah ia ka show cause notice ia ki Nonghikai ka skul Pinemount namar ka jingpynlong ia ki jingiakhih ban dawa weng iaka kong Aiom Ksiar Diengdoh na ka kam Principal jong ka skul wat hadien ka jingtuklar jong ka Sorkar.
“Baroh ki nongtrei sorkar kin hap ban iaid kat kum ki kyndon jong ka Service Rules, ym don ba lah ban iaid tam” ong u Myntri.
Kat kum ka jingong jong u, ki nonghikai kila dep ban ujor ia kane ka kam sha ka Sorkar Jylla bad ka Tnad lyngba u Director, ula leit ban jurip ia ka skul bad ula dep ruh ban aiti ia ka kaiphod ba dang shu pynkhreh malu mala (preliminary report).
“Kila wan ruh ban iakynduh ia nga ha u bnai Nailar ha Iingsah ha kaba nga la kular ban shimkhia. Kumta hi, ha ka 1 tarik Nailur ngi la pynmih ia ka jingpynbna bala thung ia ka Committee ban tohkit. Hynrei hadien kane ruh, ki briew (nonghikai) kila iaid hala ka jong ka lynti” ula ong.
“Ka Sorkar ka hap ban shimkhia ia kane bad la pynbor ia ka ban iaid kat kum ki kyndon jong ka service rules” pynshai u Myntri.
Haba kylli balei pat la ai Show Cause Notice tang ia ki 11 ngut ki nonghikai katba ka jingiakhih ka dei kaba la iashimbynta da baroh ki nonghikai jong katei ka skul, u Myntri u la ong, “Ia kata te ngam tip, 11 ngut ne 12 ngut ne 20 ngut ne 30 ngut, hynrei ia kane, nga ieh haka jingstad jongka tnad pule puthi kaba la ai iaka show cause”.
Haba kylli halor ka jingdawa weng kam shwa shipor iaka Principal ka Pine Mount katba ka Committee ka dang pynlong iaka jingtohkit, u Bah Rymbui u la ong, “Ka long kaba suk ban ong, hynrei ngi hap ban peit kat kum ka Service Rules namar ka skul Pine Mount kadei ka ‘Unitary School’ bad ngim lah ban pynkynriah kam ia ki nonghikai jong kane ka skul shawei pat bad wat iaka Principal ruh ngim lah ban pynkynriah kam shawei bad ka lad kiew kyrdan ka jong ki ruh ka kut beit tang hangto hi”.
U bah Rymbui u la pyntip ba ka jingiakren kala don ha ka sorkar ban pynwan lang noh iaka Pine Mount School bad ka Shillong, Jowai bad Tura Public School khnang ba kin don ka lad kaba biang ban kyntiew kyrdan ia ki nonghikai ha kitei ki skul.
Haba kylli, u Myntri ula pynpaw ba um pat don jingtip satia la ka Committee ba tohkit kaba dep ne em ban aiti ia ka kaiphod haba ong “Lada kam pat dep ruh, nga ngeit ba kin sa aiti noh ha kano kano ka por”.
“Kano kano ka sienjam kaba ka sorkar kan shim kan long katkum ka kaiphod bad da kawei ka jingthmu kata ka long ba ka jaka pule kadei ban long ka jaka pule bad kam dei ban long ka jaka kaba pynmih ia kano kano ka kynrum kynram” ong u Bah Lahkmen.
Halor ka jingdawa ki kmie ki kpa, ki samla pule barim bad ki nonghikai ba ka don ka jingpyn donkam bakla iaka pisa jong ka skul bad dei ban thung da ka kynhun tohkit ban tih ia katei ka jyrsieh, na ka liang u Bah Rymbui u la ong, “Ia katei, ngi la ieh haka jingstad jong ka Committee jong ki 4 ngut ki ophisar ka pule puthi, ba kin aiti iaka kaiphod bad ia mynta hi ngam pat lah ban ong eiei”.
